Հոբ 29:1-25
29 Հոբը դարձյալ սկսեց իր առակը և շարունակեց ասել.
2 «Օ՜, եթե ես լինեի այնպես, ինչպես վաղեմի լուսնային ամիսներում էի+,
Ինչպես այն օրերում, երբ Աստված պահպանում էր ինձ+,
3 Երբ նրա ճրագը լույս էր տալիս գլխիս վերևում,
Երբ նրա լույսով քայլում էի խավարի միջով+,
4 Ինչպես որ իմ կյանքի ծաղկուն օրերին էի+,
Երբ մտերիմ էի Աստծու հետ իմ վրանում+,
5 Երբ Ամենակարողը դեռ ինձ հետ էր,
Երբ բոլոր սպասավորներս իմ շուրջն էին։
6 Երբ քայլերս կարագով էի լվանում,
Եվ ժայռը յուղի հեղեղ էր թափում ինձ համար+։
7 Երբ դուրս էի գալիս քաղաքի դարպասի մոտ+,
Հրապարակում պատրաստում էի իմ աթոռը+։
8 Փոքր տղաները տեսնում էին ինձ ու թաքնվում,
Եվ նույնիսկ տարեցներն էին վեր կենում ու կանգնում+։
9 Իշխանները զսպում էին իրենց խոսքերը
Եվ իրենց ձեռքի ափը դնում էին իրենց բերանին+։
10 Առաջնորդների ձայնը դադարում էր,
Եվ նրանց լեզուն իրենց քիմքին էր կպչում+։
11 Ականջը ինձ լսում ու երջանիկ էր անվանում,
Աչքը տեսնում ու վկայում էր իմ մասին,
12 Քանի որ ես փրկում էի հարստահարվածին, որը աղաղակում էր օգնության համար+,
Որբին* ու ամեն մեկին, ով օգնական չուներ+։
13 Կործանվողի տված օրհնությունը+ ինձ վրա էր գալիս,
Եվ ես ուրախացնում էի այրու սիրտը+։
14 Արդարություն էի հագնում, և այն ծածկում էր ինձ+։
Իմ արդարությունը վերնահագուստի և խույրի պես էր։
15 Ես աչքեր էի դարձել կույրի համար+
Եվ ոտքեր՝ կաղի համար։
16 Ես հայր էի աղքատների համար+
Եվ քննում էի անծանոթի իրավական գործը+։
17 Կոտրում էի հանցավորի ծնոտը+
Եվ նրա ատամներից խլում որսը։
18 Ես ասում էի. «Իմ բնում կմեռնեմ+
Եվ ավազի հատիկների պես կշատացնեմ իմ օրերը+։
19 Իմ արմատը բաց է ջրերի համար+,
Եվ ցողը իմ ճյուղի վրա կմնա ամբողջ գիշեր։
20 Իմ փառքը դալար է մնում,
Եվ իմ ձեռքում եղած աղեղը անդադար կնետահարի»։
21 Նրանք լսում էին ինձ ու սպասում
Եվ մինչև խորհուրդ տալս լուռ էին մնում+։
22 Իմ խոսքից հետո նրանք այլևս չէին խոսում,
Եվ իմ խոսքը կաթում էր նրանց վրա+։
23 Նրանք սպասում էին ինձ, ինչպես անձրևի+,
Եվ լայն բացում էին իրենց բերանը գարնանային անձրևի+ համար։
24 Ես ժպտում էի նրանց, ու նրանք չէին հավատում
Եվ իմ երեսի լույսը+ չէին հանգցնում։
25 Ես նրանց համար ճանապարհ էի ընտրում և նստում էի գլխավորի պես,
Բնակվում էի ինչպես թագավորն իր զորքերի մեջ+,
Ինչպես մեկը, ով մխիթարում է սգավորներին»+։
Ծանոթագրություններ
^ Բռց.՝ «անհայր տղային»։
