2 Օրենք 22:1-30
22 «Եթե տեսնես, որ եղբորդ ցուլը կամ ոչխարը մոլորվել է, չթողնես հեռանաս+, այլ դրան անպատճառ եղբորդ մոտ տար+։
2 Բայց եթե եղբայրդ հեռու է և դու չես ճանաչում նրան, ապա տար քո տուն, և թող քեզ մոտ մնա, մինչև որ եղբայրդ սկսի փնտրել դրան։ Այդ ժամանակ այն վերադարձրու նրան+։
3 Նույն ձևով վարվիր նրա էշի հետ, նրա թիկնոցի հետ և նույն ձևով վարվիր եղբորդ կորցրած ցանկացած բանի հետ, որը նա կորցրել է, և դու գտել ես։ Դու չես կարող թողնել հեռանալ։
4 Եթե տեսնես, որ եղբորդ էշը կամ ցուլը ընկել է ճանապարհի վրա, չթողնես հեռանաս։ Անպատճառ օգնիր բարձրացնել դրան+։
5 Կինը չպետք է տղամարդու հագուստ հագնի, և տղամարդը չպետք է կանացի թիկնոց հագնի+, որովհետև այս բաներն անողը գարշելի է քո Աստված Եհովայի համար։
6 Եթե ճանապարհին ծառի վրա կամ գետնին քեզ թռչնի բույն հանդիպի, դրանում ձագեր+ կամ ձվեր լինեն, և մայրը նստած լինի ձագերի կամ ձվերի վրա, ապա մորը ձագերի հետ չվերցնես+։
7 Անպատճառ մորը բաց թող, իսկ ձագերին կարող ես վերցնել, որ քեզ լավ լինի և քո օրերը երկար լինեն+։
8 Նոր տուն կառուցելիս տանիքիդ վրա եզրապատ շինիր+, որպեսզի այնտեղից ոչ ոք չընկնի, ու քո պատճառով տունդ արյունապարտ չլինի։
9 Քո խաղողի այգում երկու տեսակ սերմ չցանես+, որ չլինի թե քո ցանած սերմից ստացված ողջ բերքն ու խաղողի այգու պտուղները սրբարանին տրվեն։
10 Հերկելիս եզն ու էշը միասին չլծես+։
11 Բրդից ու վուշից գործված հագուստ չհագնես+։
12 Ծոպեր պատրաստիր թիկնոցիդ չորս անկյուններին, որով ծածկվում ես+։
13 Եթե մի մարդ կին առնի, նրա հետ հարաբերություն ունենա և հետո ատի նրան+,
14 նրան մեղադրի ամոթալի գործեր անելու մեջ ու վարկաբեկի նրա անունը+՝ ասելով, թե՝ «այս կնոջը ես կնության առա, մերձեցա նրան ու տեսա, որ նա կույս չէր»+,
15 ապա այդ աղջկա հայրն ու մայրը պետք է վերցնեն նրա կուսության ապացույցը և բերեն քաղաքի երեցների մոտ՝ դարպասների մոտ+։
16 Աղջկա հայրը երեցներին թող ասի. «Աղջկաս այս մարդուն կնության տվեցի, իսկ նա ատեց+ նրան
17 և հիմա նրան մեղադրում է ամոթալի գործերի մեջ+ ու ասում. «Քո աղջիկը կույս չէր»+։ Բայց ահա իմ աղջկա կուսության ապացույցը»։ Եվ թիկնոցը պետք է փռեն քաղաքի երեցների առաջ։
18 Քաղաքի երեցները+ պետք է վերցնեն այդ մարդուն ու խրատեն նրան+։
19 Նրան պետք է տուգանեն հարյուր սիկղ արծաթով և փողը տան աղջկա հորը, որովհետև նա վարկաբեկել է իսրայելացի կույսի անունը+։ Նա կշարունակի նրա կինը լինել, և այդ մարդն իր ողջ կյանքում չի կարող բաժանվել* նրանից։
20 Սակայն եթե ապացուցվի, որ դա ճիշտ է, և աղջիկը կույս չի եղել+,
21 ապա աղջկան պետք է հանեն նրա հոր տան մուտքի մոտ, ու նրա քաղաքի մարդիկ պետք է քարկոծեն նրան. նա պետք է մեռնի, քանի որ Իսրայելում խայտառակ ու անմիտ արարք է գործել+՝ իր հոր տանը մարմնավաճառություն անելով+։ Այդպես հեռացրու չարիքը քո միջից+։
22 Եթե մի տղամարդու գտնեն ամուսին* ունեցող կնոջ հետ պառկած+, ապա երկուսն էլ պետք է մեռնեն, ինչպես կնոջ հետ պառկող տղամարդը, այնպես էլ կինը+։ Այդպես հեռացրու չարիքը Իսրայելից+։
23 Եթե քաղաքում մի տղամարդ հանդիպի մի կույս աղջկա, որը նշանված է մեկ ուրիշի հետ+, և պառկի նրա հետ+,
24 ապա երկուսին էլ բերեք այդ քաղաքի դարպասների մոտ ու քարկոծեք։ Նրանք պետք է մեռնեն. աղջկան սպանեք այն բանի համար, որ չի բղավել քաղաքում, իսկ տղամարդուն՝ այն բանի համար, որ ստորացրել է իր մերձավորի կնոջը+։ Այդպես հեռացրու չարիքը քո միջից+։
25 Բայց եթե տղամարդը նշանված աղջկան հանդիպել է դաշտում, բռնել է նրան ու պառկել նրա հետ, ապա միայն նրա հետ պառկող տղամարդը պիտի մեռնի,
26 իսկ աղջկան ոչինչ չանես։ Աղջիկը մահվան արժանի մեղք չի գործել, որովհետև սա նման է այն դեպքին, երբ մարդ հարձակվում է իր մերձավորի վրա ու սպանում նրան+՝ նրա հոգին։
27 Նա դաշտում է հանդիպել նշանված աղջկան. աղջիկը բղավել է, բայց ազատող չի եղել։
28 Եթե մի տղամարդ հանդիպի մի կույս աղջկա, որը նշանված չէ, բռնի նրան ու պառկի նրա հետ+, և դա բացահայտվի+,
29 ապա աղջկա հետ պառկող տղամարդը նրա հորը հիսուն սիկղ արծաթ պետք է տա+, և աղջիկը նրա կինը կդառնա, քանի որ նա ստորացրել է նրան։ Իր ողջ կյանքում նա չի կարող բաժանվել նրանից+։
30 Ոչ ոք իր հոր կնոջը չպետք է կնության առնի, որպեսզի իր հոր հանդերձը չբարձրացնի»+։
