2 Օրենք 8:1-20
8 «Դուք պետք է պահեք բոլոր պատվիրանները+, որ ես այսօր պատվիրում եմ ձեզ պահել, որպեսզի ապրեք+ ու շատանաք և գնաք ու տիրեք այն երկրին, որի մասին Եհովան երդվել է ձեր նախահայրերին+։
2 Հիշիր այն ողջ ճանապարհը, որով քո Աստված Եհովան այս քառասուն տարիների ընթացքում անապատում տարավ քեզ+, որպեսզի քեզ խոնարհություն սովորեցնի+, ստուգի քեզ+ և իմանա, թե ինչ կա քո սրտում+՝ արդյոք կպահես նրա պատվիրանները, թե ոչ։
3 Նա խոնարհություն էր սովորեցնում քեզ, թողնում էր, որ քաղցած լինես+, կերակրում էր մանանայով+, որը ո՛չ քեզ էր ծանոթ, ո՛չ էլ քո հայրերին, որպեսզի իմանաս, որ մարդ ոչ միայն հացով է ապրում, այլև Եհովայի բերանից դուրս եկող ամեն խոսքով+։
4 Այս քառասուն տարիների ընթացքում ո՛չ թիկնոցդ մաշվեց, ո՛չ էլ ոտքերդ ուռեցին+։
5 Քո սրտում դու լավ գիտես, որ ինչպես մարդն է ուղղում իր որդուն, այնպես էլ քո Աստված Եհովան է ուղղում քեզ+։
6 Պահիր քո Աստված Եհովայի պատվիրանները՝ քայլելով նրա ճանապարհներով+ ու վախենալով նրանից+։
7 Քո Աստված Եհովան մի լավ երկիր է տանում քեզ+՝ մի երկիր, որտեղ գետահովիտներում ջուր է հոսում, որտեղ աղբյուրներ ու ջրերի անդունդներ կան դաշտահովիտներում+ և լեռնային շրջանում,
8 ցորենի, գարու, որթատունկերի, թզերի ու նռների+ երկիր՝ մի երկիր, որտեղ մեղր կա և ձիթապտուղ, որից յուղ են ստանում+,
9 մի երկիր, որտեղ հացի պակասություն չես ունենա, որտեղ ոչնչի կարիք չես ունենա, մի երկիր, որի քարերը երկաթ են պարունակում և որի լեռներից պղինձ կհանես։
10 Երբ ուտես ու կշտանաս+, օրհնիր+ քո Աստված Եհովային այն լավ երկրի համար, որը նա տվել է քեզ+։
11 Զգույշ եղիր, որ չլինի թե մոռանաս+ քո Աստված Եհովային ու չպահես նրա պատվիրանները, դատավճիռներն ու կանոնները, որոնք այսօր պատվիրում եմ քեզ պահել+։
12 Միգուցե երբ ուտես, կշտանաս, լավ տներ շինես ու ապրես դրանցում+,
13 քո նախիրներն ու հոտերը շատանան, քո արծաթն ու ոսկին շատանան, քո ողջ ունեցվածքը շատանա,
14 այդ ժամանակ քո սիրտը հպարտանա+, և դու մոռանաս քո Աստված Եհովային, որը հանեց քեզ Եգիպտոսից՝ ստրուկների տնից+,
15 որը տարավ քեզ մեծ և ահազդու անապատի միջով+, որտեղ թունավոր օձեր+ ու կարիճներ կան, որի գետինը չոր է և անջուր, որը քեզ համար ջուր հանեց կայծքարե ժայռից+,
16 որը անապատում քեզ մանանայով կերակրեց+, ինչը անծանոթ էր քո հայրերին, որպեսզի խոնարհություն սովորեցնի քեզ+, ստուգի քեզ և հետագայում բարիք անի+։
17 Եվ միգուցե սրտումդ ասես. «Իմ զորությամբ ու ձեռքերիս ուժով ձեռք բերեցի այս հարստությունը»+։
18 Հիշիր քո Աստված Եհովային, որովհետև նա է քեզ ուժ տալիս, որ հարստություն ձեռք բերես+, և դա անում է մինչև օրս, որպեսզի կատարի իր ուխտը, որի մասին երդվել է քո նախահայրերին+։
19 Իսկ եթե մոռանաս քո Աստված Եհովային, գնաս ուրիշ աստվածների հետևից, ծառայես նրանց ու խոնարհվես նրանց առաջ, ապա այսօր վկայում եմ ձեր դեմ՝ դուք անհետ կվերանաք+։
20 Դուք կվերանաք այնպես, ինչպես այն ազգերը, որոնց Եհովան կործանում է ձեր առաջից, քանի որ չլսեցիք ձեր Աստված Եհովայի ձայնին»+։
