Alles wat die Fariseërs gedoen het, het hulle gedoen om mense te beïndruk. As hulle iets vir iemand gedoen het, was dit net omdat hulle wou hê dat ander mense dit moet raaksien. Hulle het in openbare plekke gebid sodat almal hulle kon sien. Die Fariseërs het lang gebede uit die kop geleer en dit dan oor en oor in die sinagoges en op die straathoeke opgesê waar ander mense hulle kon hoor. Daarom was die mense verbaas toe Jesus vir hulle sê: ‘Moenie soos die Fariseërs bid nie. Hulle dink dat God beïndruk sal wees met hulle baie woorde, maar hy is nie. Gebed is tussen jou en Jehovah. Moenie dieselfde dinge oor en oor sê nie. Jehovah wil hê dat jy hom moet vertel hoe jy regtig voel.

 ‘Dit is hoe julle moet bid: “Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde.”’ Jesus het ook gesê dat hulle vir God moet bid om hulle elke dag genoeg kos te gee, om hulle sondes te vergewe en oor enige ander probleme wat hulle gehad het.

Jesus het gesê: ‘Moet nooit ophou bid nie. Hou aan om julle Vader, Jehovah, vir goeie dinge te vra. Elke ouer wil graag goeie dinge aan sy kind gee. Sal jy, as jou seun jou vir brood vra, hom ’n klip gee? Sal jy, as hy vir ’n vis vra, hom ’n slang gee?’

Toe het Jesus die les verduidelik: ‘Julle weet hoe om goeie dinge aan julle kinders te gee. Sal julle Vader, Jehovah, dan nie weet hoe om heilige gees aan julle te gee nie? Al wat julle moet doen, is vra.’ Luister jy na Jesus se raad? Oor watter soort dinge bid jy?