Vriendskap is gegrond op liefde. Hoe meer jy van Jehovah leer, hoe groter sal jou liefde vir hom word. Namate jou liefde vir God toeneem, sal jou begeerte om hom te dien ook toeneem. Dit sal jou beweeg om ’n dissipel van Jesus Christus te word (Matteus 28:19). As jy deel van die gelukkige gesin van Jehovah se Getuies word, kan jy vir ewig God se vriend wees. Wat moet jy doen?

Jy moet jou liefde vir God bewys deur sy wette te gehoorsaam. “Dít is wat die liefde vir God beteken, dat ons sy gebooie onderhou; en tog is sy gebooie nie swaar nie.”—1 Johannes 5:3.

Pas toe wat jy leer. Jesus het ’n illustrasie vertel wat dit toelig. ’n Verstandige man het sy huis op rotsagtige grond gebou. ’n Dwase man het sy huis op sand gebou. Toe ’n groot storm kom, het die huis wat op die rots gebou is, nie ingestort nie, maar die huis wat op die sand gebou is, het met ’n groot instorting tot niet gegaan. Jesus het gesê dat diegene wat sy leringe hoor en dit doen soos die verstandige man is wat op die rots gebou het. Maar diegene wat na sy leringe luister en dit nie doen nie, is soos die dwase man wat op sand gebou het. Soos watter man wil jy wees?—Matteus 7:24-27.

 Toewyding. Dit beteken dat jy tot Jehovah bid en vir hom sê dat jy sy wil vir ewig wil doen. As jy God se wil doen, toon dit dat jy ’n dissipel van Jesus Christus is.—Matteus 11:29.

Doop. “Laat jou doop en was jou sondes af deur sy naam aan te roep.”—Handelinge 22:16.

Dien God heelhartig. “Wat julle ook al doen, doen dit met julle hele siel soos vir Jehovah en nie vir mense nie.”—Kolossense 3:23.