OMTRENT ’n maand ná die sluipmoord op Trujillo in 1961 is ek gedoop terwyl ek aan ’n universiteit in die regte gestudeer het. My pa wou hê dat ek in die regte moes praktiseer, maar ek kon sien hoe verhewe goddelike onderrigting is. Daarom het ek die universiteit verlaat, al het my pa groot druk op my geplaas. Kort daarna is ek as ’n spesiale pionier aangestel.

Een van my toewysings was in La Vega, wat lank oorwegend Katoliek was. Gedurende die tyd dat ek daar was, het niemand die waarheid aangeneem nie. Wanneer ek openbare toesprake gehou het, was my pioniermaat die enigste persoon in die gehoor. Maar Jehovah het my deur middel van persoonlike Bybelstudie, byeenkomste en vurige gebed onderskraag. Ek het Jehovah in gebed gevra of daar ooit ’n  gemeente in La Vega sou wees. Ek is bly om te sê dat daar nou 6 Koninkryksale, 14 gemeentes en meer as 800 Koninkryksverkondigers is.

Ek het in 1965 met my vrou, Ángela, getrou, en in 1981 is ons na Bethel genooi. Toe ek gedoop is, was daar slegs 681 verkondigers in die land. Nou is daar meer as 36 000 verkondigers, en derduisende kom by ons byeenkomste bymekaar. Wanneer ek nou terugkyk, is ek verbaas oor hoe Jehovah so baie harte vir Bybelwaarhede ontvanklik gemaak het.