Jesus het vier dissipels – Petrus, Andreas, Jakobus en Johannes – genooi om vissers van mense te wees. Nou, op die Sabbat, gaan hulle almal na ’n plaaslike sinagoge in Kapernaum. Jesus leer mense in die sinagoge, en die mense is weer eens verstom oor sy manier van leer. Hy doen dit soos iemand wat gesag het, en nie soos die skrifgeleerdes nie.

Op hierdie Sabbat is daar ’n man in wie daar ’n demoon is. Net daar in die sinagoge skree die man met ’n harde stem: “Wat het ons met jou te doen, Jesus die Nasarener? Het jy gekom om ons te vernietig? Ek weet presies wie jy is: die Heilige van God!” Jesus praat streng met die demoon wat die man beheer en sê: “Bly stil, en kom uit hom uit!” – Markus 1:24, 25.

Dan gooi die slegte gees die man op die grond en laat hom stuiptrekkings kry en kliphard skree. Maar die demoon kom uit die man uit “sonder om hom seer te maak” (Lukas 4:35). Die mense om hom in die sinagoge is verstom! “Wat is dit?” vra hulle. “Hy beveel selfs die onrein geeste met gesag, en hulle gehoorsaam hom” (Markus 1:27). Dit is te verstane dat die nuus oor hierdie indrukwekkende gebeurtenis deur die hele Galilea versprei.

Wanneer Jesus en sy dissipels die sinagoge verlaat, gaan hulle na Simon, of Petrus, se huis toe. Daar is Petrus se skoonma baie siek met ’n hoë koors. Hulle smeek Jesus om haar te help. Jesus gaan dus na haar toe, vat haar hand en help haar op. Sy is onmiddellik genees en begin Jesus en die dissipels wat daar saam met hom is, bedien, dalk deur vir hulle ’n maaltyd voor te berei.

Wanneer die son sak, kom mense van oral na Petrus se huis met hulle siekes. Binne ’n kort tydjie lyk dit asof die hele stad by die deur bymekaargekom het. Hoekom? Hulle wil genees word. Om die waarheid te sê, ‘die mense bring al die siekes wat in hulle huise was, na hom toe. En hy lê sy hande op elkeen van hulle en genees hulle’ (Lukas 4:40). Ja, dit maak nie saak aan watter siektes hulle ly nie, Jesus help hulle, net soos daar voorspel is (Jesaja 53:4). Hy bevry selfs die mense in wie daar demone is. Terwyl die slegte geeste uitkom, skree hulle: “Jy is die Seun van God” (Lukas 4:41). Maar Jesus praat streng met hulle en laat hulle nie toe om enigiets verder te sê nie. Hulle weet dat Jesus die Christus is, en hy wil nie hê hulle moet voorgee dat hulle die ware God dien nie.