1 Samuel 8:1-22
8 En toe Samuel oud geword het, het hy sy seuns as rigters vir Israel aangestel.+
2 En die naam van sy eersgebore seun was Joël,+ en die naam van sy tweede Abiʹa;+ hulle het in Berseʹba reggespreek.
3 En sy seuns het nie in sy weë gewandel nie,+ maar hulle was geneig om onregverdige wins na te jaag+ en het ’n omkoopgeskenk aanvaar+ en die reg verdraai.+
4 Na verloop van tyd het al die ouer manne van Israel+ bymekaargekom en na Samuel toe gekom in Rama
5 en vir hom gesê: “Kyk! U het oud geword, maar u seuns het nie in u weë gewandel nie. Stel tog nou vir ons ’n koning aan+ om ons te rig soos al die nasies.”
6 Maar die saak was sleg in die oë van Samuel, aangesien hulle gesê het: “Gee ons tog ’n koning om ons te rig”, en Samuel het tot Jehovah begin bid.+
7 Toe het Jehovah vir Samuel gesê:+ “Luister na die stem van die volk met betrekking tot alles wat hulle vir jou sê;+ want nie jou het hulle verwerp nie, maar my het hulle verwerp om nie koning+ oor hulle te wees nie.
8 In ooreenstemming met al hulle dade wat hulle gedoen het van die dag af dat ek hulle uit Egipte laat optrek het+ tot vandag toe, deurdat hulle my voortdurend verlaat het+ en ander gode gedien het,+ so doen hulle ook met jou.
9 En luister dan nou na hulle stem. Jy moet hulle net ernstig waarsku, en jy moet hulle vertel wat die regmatige deel is van die koning wat oor hulle sal regeer.”+
10 Toe het Samuel al die woorde van Jehovah meegedeel aan die volk wat ’n koning van hom gevra het.
11 En hy het gesê: “Dít sal die regmatige deel+ word van die koning wat oor julle sal regeer: Julle seuns sal hy neem+ en hulle vir hom in sy strydwaens+ en by sy ruiters plaas,+ en party sal voor sy strydwaens uit moet hardloop;+
12 en om vir hom hoofde oor duisend+ en hoofde oor vyftig+ aan te stel, en party om vir hom te ploeg+ en om sy oes in te samel+ en om sy oorlogstuig+ en voorwerpe vir sy strydwaens+ te maak.
13 En julle dogters sal hy as salfmengsters en kooksters en baksters+ neem.
14 En julle lande en julle wingerde+ en julle olyfboorde,+ die bestes, sal hy neem en aan sy knegte gee.
15 En van julle saailande en van julle wingerde sal hy die tiende neem,+ en hy sal dit beslis aan sy hofbeamptes+ en sy knegte gee.
16 En julle diensknegte en julle diensmeisies en julle beste beeste en julle esels sal hy neem, en hy sal hulle vir sy werk moet gebruik.+
17 Van julle kleinvee+ sal hy die tiende neem, en júlle sal sy knegte word.
18 En julle sal beslis in daardie dag uitroep weens julle koning,+ wat julle vir julle gekies het, maar Jehovah sal julle in daardie dag nie antwoord nie.”+
19 Die volk het egter geweier om na die stem van Samuel te luister+ en gesê: “Nee, maar ’n koning sal oor ons wees.
20 En ons, ook ons, moet soos al die nasies word,+ en ons koning moet ons rig en voor ons uittrek en ons oorloë voer.”
21 En Samuel het al die woorde van die volk aangehoor; toe het hy dit voor die ore van Jehovah gespreek.+
22 En Jehovah het vir Samuel gesê: “Luister na hulle stem, en jy moet ’n koning oor hulle laat regeer.”+ Toe het Samuel vir die manne van Israel gesê: “Gaan elkeen na sy stad.”
