Jeremia 11:1-23
11 Die woord wat van Jehovah tot Jeremia gekom en gesê het:
2 “HOOR die woorde van hierdie verbond!
“En jy moet dit tot die manne van Juda en tot die inwoners van Jerusalem spreek,+
3 en jy moet vir hulle sê: ‘Só het Jehovah, die God van Israel, gesê: “Vervloek is die man wat nie luister na die woorde van hierdie verbond nie,+
4 wat ek julle voorvaders beveel het op die dag toe ek hulle uit Egipteland,+ uit die ystersmeltoond,+ uitgelei het, toe ek gesê het: ‘Gehoorsaam my stem, en julle moet die dinge doen volgens alles wat ek julle beveel;+ en julle sal beslis my volk word en ek sal julle God word,+
5 om die eed gestand te doen wat ek vir julle voorvaders gesweer het,+ om aan hulle die land te gee wat oorloop van melk en heuning,+ soos dit vandag is.’”’”
En ek het geantwoord en gesê: “Amen, o Jehovah.”
6 En Jehovah het vir my gesê: “Roep al hierdie woorde uit in die stede van Juda en op die strate van Jerusalem+ en sê: ‘Hoor die woorde van hierdie verbond, en julle moet dit doen.+
7 Want ek het julle voorvaders plegtig vermaan op die dag toe ek hulle uit Egipteland laat optrek het+ en tot vandag toe, ja, vroeg opgestaan en vermaan en gesê: “Gehoorsaam my stem.”+
8 Tog het hulle nie geluister of gehoor gegee nie,+ maar hulle het elkeen in die wederstrewigheid van sy slegte hart bly wandel;+ en daarom het ek al die woorde van hierdie verbond wat ek hulle beveel het om te doen, maar wat hulle nie gedoen het nie, oor hulle gebring.’”
9 Verder het Jehovah vir my gesê: “’n Sameswering is onder die manne van Juda en onder die inwoners van Jerusalem ontdek.+
10 Hulle het teruggekeer tot die oortredings van hulle voorvaders,+ die eerstes, wat geweier het om my woorde te gehoorsaam, maar wat agter ander gode aan geloop het om hulle te dien.+ Die huis van Israel en die huis van Juda het my verbond verbreek wat ek met hulle voorvaders gesluit het.+
11 Daarom, só het Jehovah gesê: ‘Kyk, ek bring oor hulle rampspoed+ waaraan hulle nie sal kan ontkom nie;+ en hulle sal beslis tot my om hulp roep, maar ek sal nie na hulle luister nie.+
12 En die stede van Juda en die inwoners van Jerusalem sal om hulp moet gaan roep tot die gode vir wie hulle offerrook laat opgaan,+ maar wat vir hulle gewis geen redding in die tyd van hulle rampspoed sal bring nie.+
13 Want jou gode het net soveel soos jou stede geword, o Juda;+ en net soveel altare as die strate van Jerusalem het julle vir die skandelike ding opgerig,+ altare om vir Baäl offerrook te laat opgaan.’+
14 “En wat jou betref, moenie vir hierdie volk bid nie, en moenie vir hulle ’n smekende geroep of ’n gebed opstuur nie,+ want ek sal nie luister in die tyd dat hulle tot my roep oor hulle rampspoed nie.+
15 “Wat het my geliefde in my huis te doen,+ dat baie van hulle hierdie saak, die bose plan,+ sou uitvoer?+ En sal hulle dit met heilige vleis by jou laat verbygaan,+ wanneer jou rampspoed kom? Sal jy jou in dié tyd verheug?+
16 ‘’n Blaarryke olyfboom, mooi van vrug en van vorm’, is die naam wat Jehovah jou gegee het.+ By die geluid van die groot geraas het hy ’n vuur daarteen aangesteek, en hulle het sy takke gebreek.+
17 “En Jehovah van die leërs, die Een wat jou geplant het,+ het rampspoed teen jou gespreek weens die slegtheid van die huis van Israel+ en die huis van Juda wat hulle bedryf het om my aanstoot te gee deur vir Baäl offerrook te laat opgaan.”+
18 En Jehovah het my ingelig sodat ek dit weet. Toe het u my hulle handelinge laat sien.+
19 En ek was soos ’n ramlam, ’n troeteldier, wat gelei word om geslag te word,+ en ek het nie geweet dat hulle planne teen my beraam het nie:+ “Laat ons die boom met sy voedsel verwoes, en laat ons hom uit die land van die lewendes uitroei,+ sodat sy naam nie meer onthou sal word nie.”
20 Maar Jehovah van die leërs oordeel met regverdigheid;+ hy ondersoek die niere en die hart.+ Laat my tog u wraak op hulle sien, want aan u het ek my regsaak geopenbaar.+
21 Daarom, só het Jehovah gesê teen die manne van Aʹnatot+ wat jou siel soek en sê: “Jy moenie in die naam van Jehovah profeteer nie,+ sodat jy nie deur ons hand sterf nie”;
22 daarom, só het Jehovah van die leërs gesê: “Kyk, ek rig my aandag op hulle. Die jong manne sal deur die swaard sterf.+ Hulle seuns en hulle dogters sal deur die hongersnood sterf.+
23 En daar sal nie eens ’n oorblyfsel vir hulle wees nie, want ek sal rampspoed oor die manne van Aʹnatot+ bring, die jaar dat daar aandag aan hulle geskenk word.”+
