Romeine 10:1-21
10 Broers, die welwillendheid van my hart en my smeking tot God vir hulle is inderdaad met die oog op hulle redding.+
2 Want ek getuig van hulle dat hulle ’n ywer+ vir God het; maar nie ooreenkomstig juiste kennis+ nie;
3 want omdat hulle die regverdigheid van God+ nie ken nie maar hulle eie tot stand probeer bring,+ het hulle hulle nie aan die regverdigheid van God onderwerp nie.+
4 Want Christus is die einde van die Wet,+ sodat elkeen wat geloof beoefen, regverdigheid kan verkry.+
5 Want Moses skryf dat die mens wat die regverdigheid van die Wet gedoen het, daardeur sal lewe.+
6 Maar die regverdigheid wat uit geloof voortspruit, spreek soos volg: “Moenie in jou hart sê nie:+ ‘Wie sal in die hemel opvaar?’+ dit is, om Christus+ af te bring;
7 of: ‘Wie sal in die afgrond neerdaal?’+ dit is, om Christus uit die dode op te bring.”+
8 Maar wat sê dit? “Die woord is naby jou, in jou eie mond en in jou eie hart”;+ dit is die “woord”+ van geloof, wat ons verkondig.+
9 Want as jy daardie ‘woord in jou eie mond’, dat Jesus Here is,+ in die openbaar bekend maak+ en in jou hart geloof beoefen dat God hom uit die dode opgewek het,+ sal jy gered word.+
10 Want met die hart+ beoefen ’n mens geloof tot regverdigheid, maar met die mond doen ’n mens openbare bekendmaking+ tot redding.
11 Want die Skrifgedeelte sê: “Niemand wat sy geloof op hom grond,+ sal teleurgestel word nie.”+
12 Want daar is geen onderskeid tussen Jood en Griek nie,+ want oor almal is daar dieselfde Here, wat ryk is+ teenoor almal wat hom aanroep.
13 Want “elkeen wat die naam van Jehovah aanroep, sal gered word”.+
14 Maar hoe sal hulle hom aanroep in wie hulle nie geloof gestel het nie?+ En hoe sal hulle geloof stel in hom van wie hulle nie gehoor het nie? En hoe sal hulle hoor sonder dat iemand preek?+
15 En hoe sal hulle preek tensy hulle uitgestuur is?+ Net soos daar geskrywe staan: “Hoe lieflik is die voete van dié wat goeie nuus van goeie dinge bekend maak!”+
16 Tog het hulle nie almal die goeie nuus gehoorsaam nie.+ Want Jesaja sê: “Jehovah, wie het geloof gestel in wat by ons gehoor is?”+
17 Geloof volg dus op wat gehoor word.+ En wat gehoor word, is deur die woord oor Christus.+
18 Nietemin vra ek: Het hulle miskien nie gehoor nie? Kyk, in werklikheid ‘het hulle geluid oor die hele aarde uitgegaan+ en hulle woorde tot aan die eindes van die bewoonde aarde’.+
19 Nietemin vra ek: Het Israel miskien nie geweet nie?+ Eerstens sê Moses: “Ek sal julle tot jaloesie opwek deur wat nie ’n nasie is nie; ek sal julle tot hewige toorn opwek deur ’n dwase nasie.”+
20 Maar Jesaja raak baie vrymoedig en sê: “Ek is gevind deur dié wat my nie gesoek het nie;+ ek het openbaar geword aan dié wat nie na my gevra het nie.”+
21 Maar wat Israel betref, sê hy: “Die hele dag deur het ek my hande uitgestrek na ’n volk wat ongehoorsaam is+ en teëpraat.”+
