Die eerste boek van Kronieke 29:1-30
29 Koning Dawid het toe vir die hele gemeente gesê: “My seun Salomo, die een wat God gekies het,+ is jonk en onervare,+ en die werk is groot, want dit is nie ’n tempel* vir ’n mens nie, maar vir Jehovah God.+
2 En ek het baie moeite gedoen om voorbereidings te tref vir die huis van my God. Ek het die goud, die silwer, die koper, die yster,+ die hout+ en oniksstene voorsien, sowel as stene wat met messelklei geset moet word, mosaïeksteentjies, allerhande edelstene en baie albasstene.
3 En omdat die huis van my God my so na aan die hart lê,+ gee ek ook my eie+ goud en silwer vir die huis van my God. Dit is nou bo en behalwe alles wat ek vir die heilige huis bymekaargemaak het.
4 Ek gee 3 000 talente* goud van Ofir+ en 7 000 talente suiwer silwer om die mure van die kamers oor te trek.
5 Ek gee die goud en die silwer vir al die werk wat deur die ambagsmanne gedoen moet word. En wie van julle wil vandag vir Jehovah ’n vrywillige bydrae gee?”+
6 Toe het die leiers van die vaderhuise, die leiers van die stamme van Israel, die hoofde oor 1 000, die hoofde oor 100+ en die hoofde oor die sake van die koning+ vrywillige bydraes gegee.
7 En hulle het vir die diens van die huis van die ware God 5 000 talente goud, 10 000 darieke,* 10 000 talente silwer, 18 000 talente koper en 100 000 talente yster gegee.
8 Almal wat edelstene gehad het, het dit vir die skatkamer van die huis van Jehovah gegee, wat onder die toesig was van Jehiʹël,+ die Gersoniet.+
9 Die volk was baie bly oor die vrywillige bydraes wat hulle gegee het, want hulle het dit met hulle hele hart+ aan Jehovah gegee. En koning Dawid was ook baie bly.
10 Dawid het Jehovah toe voor die hele gemeente geloof en gesê: “O Jehovah, die God van ons vader Israel, mag u tot in alle ewigheid* geloof word.
11 O Jehovah, u is groot,+ magtig,+ indrukwekkend en vol prag en majesteit.*+ Alles in die hemel en op die aarde behoort aan u.+ Aan u behoort die koninkryk, o Jehovah.+ U is die hoof oor alles.
12 Rykdom en heerlikheid kom van u af,+ en u regeer oor alles,+ en in u hand is daar krag+ en mag.+ U hand kan enigiemand verhoog+ en aan almal krag gee.+
13 En nou, o ons God, dank ons u en loof ons u pragtige naam.
14 “Maar wie is ek en wie is my volk, dat ons die voorreg kan hê om sulke vrywillige bydraes te gee? Want alles kom van u, en ons het aan u teruggegee wat ons uit u hand ontvang het.
15 Ons is uitlanders voor u en tydelike inwoners, net soos al ons voorvaders.+ Want ons dae op die aarde is soos ’n skaduwee+ – sonder hoop.
16 O Jehovah ons God, al hierdie rykdom wat ons bymekaargemaak het om vir u ’n huis te bou vir u heilige naam, kom uit u hand en dit behoort alles aan u.
17 O my God, ek weet goed dat u mense se harte ondersoek+ en dat integriteit* u hart bly maak.+ In die opregtheid van my hart het ek al hierdie vrywillige bydraes gegee. En my hart loop oor van vreugde om te sien hoe u volk vrywillige bydraes aan u gee.
18 O Jehovah, die God van ons voorvaders Abraham, Isak en Israel, help u volk om vir altyd so ’n gewillige gees te behou en om u met hulle hele hart te dien.+
19 En help my seun Salomo om u gebooie,+ u herinneringe en u wetsvoorskrifte met sy hele hart*+ te gehoorsaam. Help hom om al hierdie dinge te doen en om die tempel* te bou waarvoor ek voorbereidings getref het.”+
20 Dawid het toe vir die hele gemeente gesê: “Loof Jehovah julle God.” En die hele gemeente het Jehovah, die God van hulle voorvaders, geloof en op hulle knieë gegaan en neergebuig voor Jehovah en voor die koning.
21 Die volgende dag het hulle voortgegaan om offerandes aan Jehovah te offer en brandoffers+ aan Jehovah te bring: 1 000 jong bulle, 1 000 skaapramme, 1 000 ramlammers en die drankoffers wat daarmee saamgaan.+ Hulle het baie offerandes vir die hele Israel geoffer.+
22 Op daardie dag het hulle ook met groot blydskap voor Jehovah geëet en gedrink.+ Hulle het Salomo, die seun van Dawid, vir die tweede keer koning gemaak en hom voor Jehovah as leier gesalf,+ en hulle het Sadok as priester gesalf.+
23 En Salomo het as koning in die plek van sy pa, Dawid, op Jehovah se troon gaan sit.+ Hy was suksesvol, en al die Israeliete was gehoorsaam aan hom.
24 Al die leiers,+ die magtige vegters+ en al die seuns van koning Dawid+ het hulle aan koning Salomo onderwerp.
25 Jehovah het Salomo buitengewone eer gegee sodat die hele Israel hom bewonder het. Hy het hom meer koninklike majesteit gegee as enige koning van Israel voor hom.+
26 Dawid, die seun van Isai, het oor die hele Israel regeer.
27 Hy het 40 jaar lank oor Israel regeer. Hy het 7 jaar lank in Heʹbron regeer,+ en hy het 33 jaar lank in Jerusalem regeer.+
28 Hy het op ’n goeie ouderdom gesterf,+ nadat hy ’n lang lewe, rykdom en eer geniet het. En sy seun Salomo het in sy plek koning geword.+
29 Die geskiedenis van koning Dawid is van begin tot einde opgeteken in die geskrifte van die siener Samuel, die profeet Natan+ en die siener Gad.+
30 Alles omtrent sy koningskap, sy magtige dade en alles wat met hom, met Israel en met al die omliggende koninkryke gebeur het, is ook daarin opgeteken.
Voetnote
^ Of “vesting; paleis”.
^ Of “van ewigheid tot ewigheid”.
^ Of “waardigheid”.
^ Of “met ’n hart wat ten volle toegewyd is”.
^ Of “vesting; paleis”.
