Numeri 23:1-30
23 Toe het Biʹleam vir Balak gesê: “Bou sewe altare op hierdie plek+ en maak vir my sewe bulle en sewe ramme gereed.”
2 Balak het dadelik gedoen net soos Biʹleam gesê het. En Balak en Biʹleam het ’n bul en ’n ram op elke altaar geoffer.+
3 Biʹleam het toe vir Balak gesê: “Bly hier by jou brandoffer, en ek sal gaan. Miskien sal Jehovah met my in aanraking kom. Wat hy ook al aan my openbaar, sal ek aan jou oordra.” Hy het toe na ’n heuwel gegaan.
4 Toe het God met Biʹleam in aanraking gekom,+ en Biʹleam het vir God gesê: “Ek het die sewe altare in rye geplaas, en ek het ’n bul en ’n ram op elke altaar geoffer.”
5 Jehovah het sy woorde in Biʹleam se mond gesit+ en vir hom gesê: “Keer terug na Balak, en dit is wat jy moet sê.”
6 En hy het teruggekeer en gesien dat Balak en al die leiers van Moab by sy brandoffer staan.
7 Toe het hy hierdie profetiese boodskap oorgedra:+
“Balak, die koning van Moab, het my van Aram+ laat kom,van die berge van die ooste:‘Kom tog om Jakob vir my te vervloek.
Ja, kom om Israel te veroordeel.’+
8 Hoe kan ek dié vervloek wat nie deur God vervloek is nie?
En hoe kan ek dié veroordeel wat nie deur Jehovah veroordeel is nie?+
9 Van die top van die rotse af sien ek hulle,en van die heuwels af sien ek hulle.
As ’n volk woon hulle daar op hulle eie.+
Hulle beskou hulleself nie as deel van die nasies nie.+
10 Wie kan die stof van Jakob tel,+of selfs ’n kwart van Israel?
Laat my* die dood van die regverdiges sterf,en laat my einde soos hulle s’n wees.”
11 Balak het toe vir Biʹleam gesê: “Wat het jy aan my gedoen? Ek het jou laat kom om my vyande te vervloek, maar al wat jy gedoen het, was om hulle te seën.”+
12 Hy het geantwoord: “Moet ek nie alles sê wat Jehovah in my mond sit nie?”+
13 Balak het vir hom gesê: “Kom asseblief saam met my na ’n ander plek van waar jy hulle kan sien. Jy sal net ’n deel van hulle sien, jy sal nie hulle almal sien nie. Vervloek hulle vir my van daar af.”+
14 Toe het hy hom na die veld Sofim geneem, na die top van Pisga,+ en sewe altare gebou en ’n bul en ’n ram op elke altaar geoffer.+
15 Biʹleam het toe vir Balak gesê: “Bly hier by jou brandoffer terwyl ek daar anderkant met Hom in aanraking kom.”
16 En Jehovah het met Biʹleam in aanraking gekom en Sy woorde in sy mond gesit en vir hom gesê:+ “Keer terug na Balak, en dit is wat jy moet sê.”
17 En hy het na hom toe gekom en gesien dat hy by sy brandoffer wag, en die leiers van Moab was by hom. Balak het hom gevra: “Wat het Jehovah gesê?”
18 Toe het hy hierdie profetiese boodskap oorgedra:+
“Staan op, Balak, en luister.
Hoor wat ek sê, o seun van Sippor.
19 God is nie ’n mens wat leuens vertel nie,+of ’n mensekind wat van gedagte verander nie.*+As hy iets sê, sal hy dit nie doen nie?
As hy praat, sal hy dit nie uitvoer nie?+
20 Kyk! Ek is hierheen gebring om te seën,en Hy hét geseën,+ en ek kan dit nie omdraai nie.+
21 Hy duld geen towerkrag teen Jakob nie,en hy laat geen moeilikheid teen Israel kom nie.
Jehovah sy God is met hulle,+en Hy word as koning onder hulle uitgeroep.
22 God lei hulle uit Egipte uit.+
Hy is vir hulle soos die horings van ’n wilde bul.+
23 Want daar is geen slegte voorspelling* teen Jakob nie,+ook geen waarsêery teen Israel nie.+
Nou kan daar van Jakob en Israel gesê word:‘Kyk na wat God gedoen het!’
24 Hier is ’n volk wat soos ’n leeu sal opstaan,en soos die leeu sal hy opkom.+
Hy sal nie gaan lê voordat hy prooi eeten die bloed drink van dié wat doodgemaak is nie.”
25 Balak het toe vir Biʹleam gesê: “As jy hulle dan nie kan vervloek nie, moet jy hulle ook nie seën nie.”
26 Biʹleam het Balak geantwoord: “Het ek nie vir jou gesê: ‘Ek sal alles doen wat Jehovah sê’ nie?”+
27 Balak het vir Biʹleam gesê: “Kom asseblief en laat ek jou na nog ’n ander plek neem. Miskien sal dit reg wees in die oë van die ware God dat jy hulle van daar af vervloek vir my.”+
28 Balak het toe vir Biʹleam na die top van Peor geneem, wat oor Jeʹsimon* uitkyk.+
29 Toe het Biʹleam vir Balak gesê: “Bou sewe altare op hierdie plek en maak vir my sewe bulle en sewe ramme gereed.”+
30 En Balak het gedoen net soos Biʹleam gesê het, en hy het ’n bul en ’n ram op elke altaar geoffer.
Voetnote
^ Of “my siel”.
^ Of “wat spyt voel nie”.
^ Of “onheilspellende voorteken”.
^ Of moontlik “die woestyn; die wildernis”.
