Psalms 5:1-12
Vir die musiekleier: Vir Nehilot.* ’n Melodie van Dawid.
5 Luister na my woorde, o Jehovah,+skenk aandag aan my wanneer ek sug.
2 Skenk aandag aan my geroep om hulp,o my Koning en my God, want ek bid tot u.
3 O Jehovah, u sal my stem in die oggend hoor.+
In die oggend sal ek u vertel wat my bekommer,+ en ek sal hoopvol wag.
4 Want u is nie ’n God wat bly is oor goddeloosheid nie.+
Niemand wat sleg is, mag by u bly nie.+
5 Niemand wat hoogmoedig is, mag in u teenwoordigheid staan nie.
U haat almal wat goddeloos optree.+
6 U sal dié vernietig wat leuens vertel.+
Jehovah haat mense wat gewelddadig en bedrieglik is.*+
7 Maar danksy u groot lojale liefde+ sal ek in u huis ingaan,+en ek sal uit eerbiedige vrees vir u in die rigting van u heilige tempel* neerbuig.+
8 Lei my in u regverdigheid, o Jehovah, as gevolg van my vyande,maak u weg gelyk voor my.+
9 Want niks wat hulle sê, kan vertrou word nie.
Daar is niks behalwe vyandigheid in hulle nie.
Hulle keel is ’n oop graf,en hulle vlei met hulle tong.*+
10 Maar God sal hulle skuldig verklaar.
Hulle eie planne sal hulle ondergang veroorsaak.+
Mag hulle verdryf word as gevolg van hulle baie oortredings,want hulle het teen u in opstand gekom.
11 Maar almal wat beskerming by u kom soek, sal bly wees.+
Hulle sal altyd van vreugde uitroep.
U sal hulle beskerm,*en dié wat u naam liefhet, sal bly wees as gevolg van u.
12 Want u sal almal seën wat regverdig is, o Jehovah,u sal hulle met goedkeuring omring soos met ’n groot skild.+
Voetnote
^ Of “’n man van bloedvergieting en bedrog”.
^ Of “heiligdom”.
^ Of “hulle gebruik ’n gladde tong”.
^ Of “toegang tot hulle versper”.
