Op 24 Februarie 2022 het Rusland Oekraïne binnegeval. Dit het ’n baie ernstige situasie veroorsaak waar miljoene mense se lewens in gevaar is, en baie het uit die land gevlug. a

 “Daar was bomme en ontploffings. Dit is moeilik om in woorde te beskryf hoe bang ek was. Toe ons gehoor het dat daar treine was wat mense help om te vlug, het ons besluit om te gaan. Ons moes alles agterlaat omdat elke persoon net een klein rugsak kon saamvat. Ons kon net dokumente, medisyne, water en ietsie om te eet inpak. Ons het alles agtergelaat en na die treinstasie toe gegaan terwyl die bomme rondom ons geval het.” – Nataliia van Charkif, Oekraïne.

 “Tot op die laaste oomblik het ons nie gedink dat daar regtig ’n oorlog sou wees nie. Ek het ontploffings in party dele van die stad gehoor, en vensters het geskud. Ek het besluit om te vlug en het net dinge saamgevat wat ek regtig nodig gehad het. Ek het my huis om agtuur die oggend verlaat en ’n trein na Lviv gevat en toe ’n bus na Pole.” – Nadija van Charkif, Oekraïne.

In hierdie artikel

•  Wat is die werklike oorsake van hierdie vlugtelingkrisis?

•  Waar kan vlugtelinge hoop kry?

•  Kan die Bybel vlugtelinge in ons tyd help?

 Wat is die werklike oorsake van hierdie vlugtelingkrisis?

 Die vlugtelingkrisis het begin omdat Rusland se weermag Oekraïne binnegeval het. Maar die Bybel wys dat daar ander groter oorsake is vir al hierdie probleme:

•   Menseregerings regoor die wêreld het dit nie reggekry om vir mense te gee wat hulle nodig het nie. Regerings gebruik dikwels hulle gesag om mense te beheer en te mishandel. – Prediker 4:1; 8:9.

•   Satan die Duiwel, “die heerser van die wêreld”, het so ’n slegte invloed op mense dat die Bybel sê: “Die hele wêreld is in die mag van die Duiwel.” – Johannes 14:30; 1 Johannes 5:19.

•   Behalwe vir die probleme wat die mens al honderde jare lank ondervind, lewe ons nou in ’n tyd waaroor die Bybel voorspel het: “In die laaste dae [sal daar] swaar tye . . . wees wat moeilik is om deur te kom” (2 Timoteus 3:1). Gedurende hierdie tydperk sal daar ook oorloë, natuurrampe, voedseltekorte en vreeslike siektes wees – dinge wat veroorsaak dat mense vlug. – Lukas 21:10, 11.

 Waar kan vlugtelinge hoop kry?

 Die Bybel wys dat ons Skepper, Jehovah, b ’n God is wat lief is vir en meegevoel het met vlugtelinge en mense wat hulle huise moet verlaat (Deuteronomium 10:18). Hy belowe dat hy die probleme van vlugtelinge gaan oplos deur middel van sy hemelse regering, wat God se Koninkryk genoem word. Dit sal alle menseregerings vervang (Daniël 2:44; Matteus 6:10). Jehovah sal sy Koninkryk gebruik om Satan die Duiwel te verwyder (Romeine 16:20). Daardie Koninkryk sal ’n wêreldwye regering wees, en dit sal ontslae raak van lande se grense wat verdeeldheid veroorsaak. Alle mense sal deel wees van ’n wêreldwye verenigde familie. Niemand sal ooit weer hoef te vlug nie, want die Bybel belowe: “Hulle sal elkeen onder sy wingerdstok en onder sy vyeboom sit, en niemand sal hulle bang maak nie, want Jehovah van die leërmagte het dit gesê.” – Miga 4:4.

 Net God se Koninkryk kan ’n permanente oplossing gee vir die vlugtelingkrisis wat ons vandag ondervind. Jehovah sal sy Koninkryk gebruik om ’n einde te maak aan die probleme wat mense dwing om vlugtelinge te word. Kyk na ’n paar voorbeelde:

•   Oorloë. “[Jehovah] maak . . . ’n einde aan oorloë” (Psalm 46:9). Om uit te vind hoe God ’n einde aan konflik gaan maak, lees die artikel “Vrede op aarde—Hoe sal dit tot stand kom?”

•   Onderdrukking en geweld. “Van onderdrukking en van geweld sal [Jehovah] hulle red” (Psalm 72:14). Om te verstaan hoe mense ’n negatiewe gesindheid wat hulle al lank het, kan verander, lees die reeks artikels “Hoe om die siklus van haat te breek”.

•   Armoede. “[Jehovah] sal die arme red wat om hulp roep” (Psalm 72:12). Om te sien hoe God die hoofoorsake van armoede gaan oplos, lees die artikel “Is ’n regverdige ekonomiese stelsel moontlik?”

•   Voedseltekorte. “Daar sal volop graan op die aarde wees” (Psalm 72:16). Om uit te vind hoe God gaan seker maak dat niemand honger ly nie, lees die artikel “’n Wêreld sonder voedseltekorte?”

 Kan die Bybel vlugtelinge in ons tyd help?

 Ja. Die Bybel gee nie net vir vlugtelinge ’n betroubare hoop vir die toekoms nie, maar dit kan hulle ook help met die uitdagings wat hulle nou het.

 Bybelwaarheid: “Moet oor niks bekommerd wees nie, maar vra God in elke situasie om julle te help deur tot hom te bid, hom te smeek en hom te dank. Dan sal die vrede van God, wat alle denke oortref, julle harte en julle verstande beskerm.” – Filippense 4:6, 7.

 Betekenis: Vra God om vir jou innerlike vrede te gee, maak nie saak wat jou situasie is nie. Lees die artikel “Filippense 4:6, 7 – ‘Moet oor niks bekommerd wees nie’”.