Op 23 Mei 2023 het ’n senior gesondheidsamptenaar in die Verenigde State die publiek gewaarsku dat sosiale media ’n slegte uitwerking op baie jongmense het.

•   “Hoewel sosiale media voordele kan inhou vir party kinders en tieners, is daar ook baie bewyse dat sosiale media die verstandelike en fisiese gesondheid van kinders en tieners erg kan benadeel.” – Social Media and Youth Mental Health: The U.S. Surgeon General’s Advisory, 2023.

 Die verslag het navorsing aangehaal wat verduidelik hoekom mense bekommerd moet wees.

•   Jongmense tussen die ouderdom van 12 en 15 “wat meer as 3 uur per dag op sosiale media spandeer, is twee keer meer geneig om verstandelike gesondheidsprobleme te ondervind, insluitende simptome soos depressie en angstigheid”.

•   Wanneer 14-jariges “sosiale media meer gebruik, het hulle dikwels nie genoeg geslaap nie, is hulle aanlyn geboelie, het hulle sleg gevoel oor hoe hulle lyk en het hulle ook waardeloos en depressief gevoel. En dit is meer geneig om met meisies te gebeur as met seuns.”

 Hoe kan ouers hulle kinders teen hierdie gevare beskerm? Die Bybel gee praktiese raad.

 Raak betrokke. Ouers, oorweeg die gevare en besluit of jou kind sosiale media moet gebruik of nie.

•   Bybelwaarheid: “Lei ’n kind op in die weg wat hy moet volg.” – Spreuke 22:6.

•   Om meer uit te vind, lees die artikel “Moet my kind sosiale media gebruik?”

 As jy jou kind toelaat om sosiale media te gebruik, wees bewus van die moontlike gevare en bly betrokke by jou kind se aanlyn bedrywighede. Hoe?

 Beskerm jou kind teen skadelike inligting. Lei jou kind op om skadelike inligting te identifiseer en te vermy.

•   Bybelwaarheid: “Laat seksuele onsedelikheid en elke soort onreinheid of gierigheid nie eers onder julle genoem word nie, . . . en ook nie skandelike gedrag of dwase praatjies of vuil grappe nie.” – Efesiërs 5:3, 4.

•   Vir praktiese wenke, lees die artikel “Leer jou tiener hoe om sosiale media op ’n veilige manier te gebruik”.

 Stel beperkings. Maak byvoorbeeld reëls oor wanneer en vir hoe lank jou kind sosiale media mag gebruik.

•   Bybelwaarheid: “Hou . . . aan om noukeurig te let op hoe julle julle gedra, dat dit . . .as wyse persone [is], en maak die beste gebruik van julle tyd.”– Efesiërs 5:15, 16.

•   Gebruik die witbord-tekenprent Werk slim met sosiale netwerke om jou kind te help om te besef hoekom beperkings nodig is.