2 Is dit ons skuld dat ons swaarkry?
Hoekom dit saak maak
As die antwoord ja is, dan is dit dalk vir ons moontlik om iets aan swaarkry te doen.
Iets om oor te dink
Tot watter mate is mense verantwoordelik vir die volgende oorsake van swaarkry?
-
Mishandeling.
Die Wêreldgesondheidsorganisasie (WGO) skat dat 1 uit 4 volwassenes die een of ander tyd gedurende hulle kinderjare fisies mishandel is. Hulle skat ook dat 1 uit 3 vroue die een of ander tyd in hulle lewe fisies of seksueel aangerand is (of albei).
-
Sterfgevalle.
Die World Health Statistics 2018 wat deur die WGO uitgegee is, sê: “In 2016 is daar omtrent 477 000 moorde oor die hele wêreld gepleeg.” Dit is bo en behalwe die 180 000 mense wat hulle dink gedurende daardie jaar in oorloë en gevegte doodgemaak is.
-
Gesondheidsprobleme.
Fran Smith het in ’n artikel in die tydskrif National Geographic gesê: “Meer as ’n miljard mense rook, en tabak word genoem onder die top vyf oorsake van sterftes: hartsiekte, beroerte, lugweginfeksie, chroniese obstruktiewe lugwegsiekte en longkanker.”
-
Sosiale ongelykheid.
Jay Watts, ’n sielkundige, sê: “Armoede, ongelykheid, rassisme, seksisme, mense wat gedwing word om te trek en ’n kompeterende gees vergroot almal die kanse van emosionele pyn en swaarkry.”
VIND MEER UIT
Kyk na die video Hoekom het God die aarde geskep? op jw.org.
Wat die Bybel sê
Mense is grootliks verantwoordelik vir swaarkry.
Baie van die swaarkry is veroorsaak deur onderdrukkende regerings. Hulle het die lewe net nog moeiliker gemaak vir die mense wat hulle veronderstel is om te help.
‘Die mens heers oor die mens tot sy nadeel.’ – PREDIKER 8:9.
Daar kan iets aan swaarkry gedoen word.
Bybelwaarhede help dat ons gesonder lewe en vreedsame verhoudings met ander het.
“’n Kalm hart beteken lewe vir die liggaam, maar jaloesie vreet ’n mens op.” – SPREUKE 14:30.
“Moenie enige soort wrok koester nie, en laat vaar alle woede, geskree en beledigende taal, saam met alles wat sleg is.” – EFESIËRS 4:31.
