’n Geleentheid wat jy moet bywoon

“Elke goeie gawe en elke volmaakte geskenk” daal neer van God, ons hemelse Vader.—Jakobus 1:17.

DIE grootste gawe wat God die gevalle mensdom gegee het, is die voorsiening vir hulle verlossing deur middel van sy enigverwekte Seun, Jesus Christus. Die dood van Jesus, ons Verlosser, maak die ewige lewe op ’n paradysaarde moontlik. In Lukas 22:19 word ons die opdrag gegee om sy dood te herdenk.

Jehovah se Getuies nooi jou hartlik uit om saam met hulle Jesus se opdrag te gehoorsaam. Hierdie jaarlikse viering sal ná sononder gehou word op die datum wat ooreenkom met 14 Nisan op die Bybel se maankalender—Sondag, 8 April 2001. Maak gerus ’n aantekening van hierdie datum sodat jy dit nie sal vergeet nie. Jehovah se Getuies in jou omgewing sal vir jou kan sê presies waar en hoe laat dit gehou gaan word.