JEHOVAH is ons “Grootse Onderrigter” (Jes. 30:20). Liefde beweeg hom om ander te onderrig en op te lei. Byvoorbeeld, innige liefde beweeg Jehovah om “alles wat hy self doen”, vir Jesus te wys (Joh. 5:20). Liefde vir ons, sy Getuies, beweeg Jehovah om ons “die tong van dié wat geleer is”, te gee wanneer ons alles in ons vermoë doen om hom te eer en ander te help.—Jes. 50:4.

In navolging van Jehovah se voorbeeld van liefde gebruik die Onderrigtingskomitee van die Bestuursliggaam tien teokratiese skole om diegene op te lei wat die begeerte sowel as die omstandighede het om dit by te woon. Beskou jy hierdie skole as ’n bewys van Jehovah se liefde?

Hier volg ’n oorsig van die huidige teokratiese skole en die opmerkings van party wat dit bygewoon het. Terwyl jy daardeur lees, vra jou af: ‘Hoe kan ek by hierdie goddelike onderrigting baat vind?’

As “die God van liefde” voorsien Jehovah opleiding wat ons lewe sinvoller maak, ons voorberei om uitdagings die hoof te bied en ons help om groot vreugde uit ons bediening te put (2 Kor. 13:11). Soos die eerste-eeuse dissipels, is ons goed toegerus om ander te help deur ‘hulle te leer om alles te onderhou’ wat ons beveel is.—Matt. 28:20.

Hoewel ons dalk nie al hierdie skole kan bywoon nie, kan ons by een of meer daarvan baat vind. En ons kan die Bybelse onderrigting toepas wat deur hierdie skole voorsien word. Ons kan ook bekwamer word in die bediening as ons saam met goed opgeleide knegte van Jehovah werk.

Vra jou af: ‘Laat my omstandighede my toe om enige van hierdie skole te probeer bywoon?’

Jehovah se aanbidders beskou dit as ’n voorreg om hierdie waardevolle skole te ondersteun en daar onderrig te word. Mag die opleiding wat jy ontvang, jou nader aan God laat kom en jou toerus om jou verantwoordelikhede voor hom na te kom, veral die dringende opdrag om die goeie nuus te verkondig.