Dit is wanneer iemand glad nie van ’n ander persoon of groep mense hou nie of hulle as vyande beskou. Dit is meer as om net vir ’n kort tydjie kwaad te wees vir iemand.

Daar is baie redes hoekom mense begin haat. Mense haat dikwels ander, nie noodwendig as gevolg van wat hulle doen nie, maar as gevolg van wie daardie mense is. Hulle haat daardie mense omdat hulle dink dat alle mense in daardie groep sleg of gevaarlik is of nie kan verander nie. Daardie mense word beskou as minder belangrik, as ’n bedreiging of as die oorsaak van probleme. Mense wat ander haat, het dalk self geweld en diskriminasie ondervind, of iets het met hulle gebeur wat veroorsaak het dat hulle gevoelens van haat ontwikkel het.

’n Persoon kan ander haat al het hy hulle nog nooit eers ontmoet nie. Byvoorbeeld, mense voel baie keer dieselfde as wat hulle vriende of familie oor ’n groep mense voel. Op hierdie manier kan haat maklik versprei en veroorsaak dat baie mense dieselfde beskouing van ’n groep mense kan hê.

Wanneer ons verstaan hoe maklik haat versprei, kan ons verstaan hoekom so baie mense ander haat. Maar om die siklus van haat in die wêreld te breek, moet ons uitvind waar haat vandaan kom. Die Bybel wys wat die antwoord is.

HAAT HET NIE BY MENSE BEGIN NIE. Dit het begin toe ’n engel in die hemel, wat later Satan die Duiwel genoem is, teen God in opstand gekom het. Die Duiwel “was ’n moordenaar van die begin af,” toe hy in opstand gekom het. As “’n leuenaar en die vader van die leuen” hou hy aan om haat en aggressiewe gedrag te veroorsaak (Johannes 8:44; 1 Johannes 3:11, 12). Die Bybel beskryf hom as wreed, kwaad en aggressief. – Job 2:7; Openbaring 12:9, 12, 17.

DIT IS MAKLIK VIR ONVOLMAAKTE MENSE OM TE HAAT. Die eerste man, Adam, het Satan se sondige weg gevolg. As gevolg hiervan het alle mense sonde en onvolmaaktheid oorgeërf (Romeine 5:12). Adam se eerste seun, Kain, het sy eie broer Abel vermoor omdat hy hom gehaat het (1 Johannes 3:12). Dit is waar dat baie mense liefde en meegevoel vir ander het. Maar as gevolg van sonde wat ons oorgeërf het, is baie mense geneig om selfsugtig, afgunstig en trots te wees – eienskappe wat haat bevorder. – 2 Timoteus 3:1-5.

HAAT FLOREER AS DAAR ONVERDRAAGSAAMHEID IS. Die wêreld waarin ons lewe, veroorsaak meer haat deur genadelose en skadelike gesindhede en gedrag te bevorder. Gedrag soos om onverdraagsaam te wees, om te diskrimineer, om ander te beledig, om ander te boelie en hulle besittings te beskadig, raak al hoe meer omdat “die hele wêreld . . . in die mag van [Satan] die Duiwel” is. – 1 Johannes 5:19.

Maar die Bybel wys nie net vir ons waar haat begin het nie. Dit gee ook die oplossing.