STUDIEARTIKEL 31
“Wees standvastig, onbeweeglik”
“My geliefde broers, wees standvastig, onbeweeglik.” – 1 KOR. 15:58.
LIED 122 Wees standvastig, onbeweeglik!
IN HIERDIE ARTIKEL a
1-2. Op watter manier kan ’n Christen soos ’n baie hoë gebou wees? (1 Korintiërs 15:58)
IN DIE laat 1970’s is ’n baie hoë gebou in Tokyo, Japan, gebou. Mense het gewonder hoe dit sou kon bly staan omdat daar so baie aardbewings in daardie stad was. Wat was die geheim? Ingenieurs het die gebou ontwerp sodat dit sterk genoeg maar op dieselfde tyd buigsaam genoeg kan wees sodat dit die vibrasies kon weerstaan wat deur ’n aardbewing veroorsaak word. Christene is soos daardie baie hoë gebou. Op watter manier?
2 ’n Christen moet ’n balans behou tussen om standvastig te wees en buigsaam te wees. Hy moet sterk en onbeweeglik wees wanneer dit kom by die gehoorsaamheid van Jehovah se wette en standaarde. (Lees 1 Korintiërs 15:58.) Hy is ‘bereid om gehoorsaam te wees’, en hy bly getrou. Aan die ander kant moet hy “redelik”, of buigsaam, wees wanneer dit moontlik of nodig is (Jak. 3:17). ’n Christen wat geleer het om gebalanseerd te wees, sal nie te streng of te toegewend wees nie. In hierdie artikel sal ons bespreek hoe ons onbeweeglik kan wees. Ons sal ook vyf maniere identifiseer waarop Satan dit vir ons probeer moeilik maak om standvastig te bly en leer hoe ons hom kan weerstaan.
HOE KAN ONS STANDVASTIG WEES?
3. Watter wette van die Allerhoogste Wetgewer kry ons in Handelinge 15:28, 29?
3 As die Allerhoogste Wetgewer het Jehovah nog altyd sy wette duidelik aan sy volk oorgedra (Jes. 33:22). Byvoorbeeld, die eerste-eeuse bestuursliggaam het drie maniere geïdentifiseer waarop Christene standvastig moet bly: (1) deur afgodediens te verwerp en net Jehovah te aanbid, (2) deur die heiligheid van bloed te respekteer en (3) deur die Bybel se hoë sedelike standaarde te gehoorsaam. (Lees Handelinge 15:28, 29.) Hoe kan Christene vandag aan Jehovah gehoorsaam wees op hierdie drie gebiede?
4. Hoe gee ons Jehovah uitsluitlike toegewydheid? (Openbaring 4:11)
4 Ons verwerp afgodediens en aanbid net Jehovah. Hy het die Israeliete beveel om hom uitsluitlike toegewydheid te gee (Deut. 5:6-10). En toe Jesus deur die Duiwel versoek was, het hy duidelik gesê dat ons net Jehovah moet aanbid (Matt. 4:8-10). Daarom aanbid ons nie afgode nie. Ons aanbid ook nie mense nie. Byvoorbeeld, ons sal nie ’n godsdiensleier, ’n politikus of ’n bekende atleet, akteur of musikant soos ’n god behandel nie. Ons bly aan Jehovah se kant en aanbid net die een wat “alles geskep” het. – Lees Openbaring 4:11.
5. Hoekom is ons gehoorsaam aan Jehovah se wet oor die heiligheid van lewe en bloed?
5 Ons is gehoorsaam aan Jehovah se wet oor die heiligheid van lewe en bloed. Hoekom? Omdat Jehovah sê dat bloed lewe voorstel, ’n kosbare geskenk van hom (Lev. 17:14). Toe Jehovah mense begin toelaat om vleis te eet, het hy hulle beveel om nie die bloed te eet nie (Gen. 9:4). Hy het hierdie bevel herhaal toe hy die Wet van Moses aan Israel gegee het (Lev. 17:10). En hy het gesê dat die eerste-eeuse bestuursliggaam alle Christene moet beveel om hulle te “weerhou . . . van bloed” (Hand. 15:28, 29). Ons gehoorsaam hierdie bevel getrou wanneer ons mediese besluite maak. b
6. Wat doen ons sodat ons gehoorsaam kan wees aan Jehovah se hoë sedelike standaarde?
6 Ons is streng gehoorsaam aan Jehovah se hoë sedelike standaarde (Heb. 13:4). Deur kragtige figuurlike taal te gebruik, spoor die apostel Paulus ons aan om ons liggaamsdele ‘dood te maak’. Dit beteken dat ons alles moet doen wat ons kan om ontslae te raak van enige verkeerde begeertes. Ons vermy dit om na enige iets te kyk of om enige iets te doen wat kan lei tot seksuele onsedelikheid (Kol. 3:5; Job 31:1). Wanneer ons in die versoeking kom om iets verkeerds te doen, verwerp ons onmiddellik enige gedagte of daad wat ons vriendskap met God kan beskadig.
7. Wat moet ons vasbeslote wees om te doen, en hoekom?
7 Jehovah verwag dat ons “uit die hart gehoorsaam” moet wees (Rom. 6:17). Sy raad is altyd goed vir ons, en ons kan nie sy wette verander nie (Jes. 48:17, 18; 1 Kor. 6:9, 10). Ons probeer ons bes om Jehovah gelukkig te maak en om dieselfde gesindheid te openbaar as die psalmskrywer wat gesê het: “Ek is vasbeslote om u wetsvoorskrifte te gehoorsaam, te alle tye, tot die einde toe” (Ps. 119:112). Maar Satan sal probeer om dit vir ons moeilik te maak om standvastig te bly. Watter metodes gebruik hy?
HOE PROBEER SATAN DIT VIR ONS MOEILIK MAAK OM STANDVASTIG TE BLY?
8. Hoe gebruik Satan vervolging om dit vir ons moeilik te maak om standvastig te bly?
8 Vervolging. Die Duiwel gebruik fisiese en emosionele aanvalle om dit vir ons moeilik te maak om standvastig te bly. Sy doel is om ons “te verslind”, om ons verhouding met Jehovah te vernietig (1 Pet. 5:8). Christene in die eerste-eeu was gedreig, geslaan en doodgemaak as gevolg van hulle vasbeslotenheid om standvastig te bly (Hand. 5:27, 28, 40; 7:54-60). Vandag hou Satan aan om vervolging te gebruik. Ons kan dit sien in die wrede manier hoe teenstanders ons broers en susters in Rusland en in ander lande behandel en in die manier hoe teenstanders ons broers en susters vervolg.
9. Gee ’n voorbeeld wat wys dat dit belangrik is om bewus te wees van subtiele gevare.
9 Subtiele gevare. Buiten vervolging gebruik Satan “slinkse planne” (Ef. 6:11). Kyk na die voorbeeld van ’n broer met die naam Bob, wat hospitaal toe moes gaan vir ’n groot operasie. Hy het vir die dokters gesê dat hy onder geen omstandighede ’n bloedoortapping sou aanvaar nie. Die dokter het gesê dat hy sy besluit sou respekteer. Maar die aand voor die operasie het ’n ander dokter na Bob toe gekom nadat sy familie huis toe gegaan het. Hy het vir Bob gesê dat die dokters heel moontlik nie bloed sal gebruik nie, maar dat hulle dit beskikbaar sou hê net ingeval dit nodig is. Dalk het die dokter gedink dat Bob sy besluit sou verander omdat sy familie nie daar is nie. Maar Bob het standvastig gebly en gesê dat daar onder geen omstandighede vir hom bloed gegee moet word nie.
10. Hoekom is dit gevaarlik om soos dié te dink wat Jehovah se wette ignoreer? (1 Korintiërs 3:19, 20)
10 Die denke van dié wat Jehovah se wette ignoreer. As ons soos mense dink wat Jehovah se wette ignoreer, sal ons Jehovah en sy wette dalk ook begin ignoreer. (Lees 1 Korintiërs 3:19, 20.) “Die wysheid van hierdie wêreld” beïnvloed mense dikwels om ongehoorsaam aan God te wees. ’n Paar Christene in Pergamum en Tiatira was beïnvloed deur mense om hulle wat onsedelik was en wat afgode aanbid het. Jesus het albei gemeentes streng raad gegee omdat hulle seksuele onsedelikheid verdra het (Op. 2:14, 20). Vandag kan mense om ons ons probeer beïnvloed om verkeerde idees te aanvaar. Familielede en mense wat ons ken, kan dalk probeer om ons te oortuig dat ons te streng is en dat ons Jehovah se wette moet breek. Byvoorbeeld, hulle sê dalk dat dit nie belangrik is om sedelik rein te bly nie en dat die Bybel se sedelike standaarde outyds is.
11. Wat moet ons vermy terwyl ons standvastig bly?
11 Partykeer dink ons dalk dat Jehovah ons nie instruksies gee wat duidelik genoeg is nie. Ons kan dalk selfs in die versoeking kom om “verder [te] gaan as die dinge wat geskryf is” (1 Kor. 4:6). Die godsdiensleiers in Jesus se dag was hieraan skuldig. Deur mensgemaakte reëls by die Wet te voeg, het hulle dit vir die gewone mense baie moeiliker gemaak om daaraan gehoorsaam te wees (Matt. 23:4). Jehovah gee ons duidelike riglyne deur sy Woord en deur sy organisasie. Ons het geen rede om enige iets te voeg by dit wat hy voorsien nie (Spr. 3:5-7). Daarom gaan ons nie verder as wat in die Bybel geskryf is nie, en ons maak nie reëls vir ons broers en susters oor persoonlike sake nie.
12. Hoe gebruik Satan “leë bedrog”?
12 Bedrog. Satan gebruik “leë bedrog” en “die basiese dinge van die wêreld” om mense te mislei en te verdeel (Kol. 2:8). In die eerste eeu het dit filosofie ingesluit wat gebaseer was op menslike idees, asook leringe van die Jode wat nie gebaseer was op die Skrif nie en die lering dat Christene gehoorsaam moet wees aan die Wet van Moses. Hierdie idees het mense mislei omdat dit mense se aandag afgetrek het van die ware Bron van wysheid, Jehovah. Vandag gebruik Satan die media en sosiale netwerke om samesweringsteorieë te versprei, asook valse nuusverslae wat deur politieke leiers bevorder word. Gedurende die COVID-19-pandemie was daar baie van hierdie valse stories. c Jehovah se Getuies wat geluister het na die riglyne wat deur ons organisasie gegee was, was nie so angstig soos dié wat geluister het na misleidende inligting nie. – Matt. 24:45.
13. Hoekom moet ons versigtig wees sodat ons aandag nie afgelei word nie?
13 Afleidings. Ons moet gefokus bly op “die belangriker dinge” (Fil. 1:9, 10). Wanneer ons aandag afgelei is, mors ons baie van ons tyd en energie. Die dinge wat ons gewoonlik doen – soos om te eet, te drink, te ontspan en sekulêre werk te doen – kan afleidings word as ons dit die belangrikste dinge in ons lewe maak (Luk. 21:34, 35). Ons word ook elke dag gebombardeer met nuusverslae oor protesoptogte en politieke kwessies. Ons moet seker maak dat ons nie afgelei word deur hierdie dinge nie. Anders kan ons dalk begin kant kies in ons verstand en hart. Satan gebruik al die metodes wat hierbo genoem is om ons minder vasbeslote te maak om te doen wat reg is. Kom ons kyk hoe ons hom kan weerstaan en standvastig kan bly.
HOE KAN ONS STANDVASTIG BLY?
Om standvastig te bly, dink na oor jou toewyding en doop, studeer God se Woord en dink daaroor na, ontwikkel ’n standvastige hart en vertrou op Jehovah (Sien paragraaf 14-18)
14. Wat is een ding wat ons kan help om standvastig aan Jehovah se kant te bly?
14 Dink na oor jou toewyding en doop. Jy het daardie stappe geneem omdat jy aan Jehovah se kant wou staan. Dink terug aan wat jou gehelp het om oortuig te word dat jy die waarheid gevind het. Jy het akkurate kennis van Jehovah ingeneem en jou respek en liefde vir hom as jou hemelse Vader het gegroei. Jy het geloof ontwikkel en was gemotiveer om berou te toon. Jou hart het jou gemotiveer om op te hou met verkeerde dinge en om in ooreenstemming met God se wil te lewe. Jy het verlig gevoel toe jy besef het dat God jou vergewe het (Ps. 32:1, 2). Jy het Christelike vergaderinge bygewoon en begin om met ander te praat oor die wonderlike dinge wat jy geleer het. As ’n toegewyde en gedoopte Christen is jy nou op die pad na die lewe en is jy vasbeslote om daarop te bly. – Matt. 7:13, 14.
15. Hoekom is dit goed as ons studeer en nadink oor dit wat ons lees?
15 Studeer God se Woord en dink daaroor na. Net soos ’n boom sterk kan staan as dit diep wortels het, kan ons standvastig bly as ons geloof in God se Woord diepgewortel is. Soos ’n boom groei, groei sy wortels dieper en versprei dit verder. Wanneer ons studeer en nadink oor dit wat ons lees, versterk ons ons geloof en is ons meer oortuig dat God se manier van dinge doen, die beste is (Kol. 2:6, 7). Dink na oor hoe Jehovah se instruksies, raad en beskerming sy knegte in die verlede gehelp het. Byvoorbeeld, Esegiël het ’n engel mooi dopgehou terwyl hy die tempel wat Esegiël in ’n visioen gesien het, versigtig gemeet het. Hierdie visioen het Esegiël versterk, en dit gee ons praktiese lesse oor hoe ons gehoorsaam kan wees aan Jehovah se standaarde vir rein aanbidding (Eseg. 40:1-4; 43:10-12). d Ons vind ook daarby baat wanneer ons tyd neem om te studeer en na te dink oor die dieper dinge van God se Woord.
16. Hoe het ’n standvastige hart Bob beskerm? (Psalm 112:7)
16 Ontwikkel ’n standvastige hart. Koning Dawid het gesê dat hy nooit sy liefde vir Jehovah sou verloor nie toe hy gesing het: “My hart is standvastig, o God” (Ps. 57:7). Ons kan ook ’n standvastige hart hê en ten volle op Jehovah vertrou. (Lees Psalm 112:7.) Kyk hoe dit Bob, wat vroeër genoem is, gehelp het. Toe daar vir hom gesê was dat daar bloed beskikbaar sou wees net ingeval dit nodig was, het hy onmiddellik gesê dat hy die hospitaal dadelik sou verlaat as daar enige kans is dat hulle vir hom bloed gaan gee. Later het Bob gesê: “Ek het nooit getwyfel oor wat ek sou doen nie, en ek was nie bekommerd oor wat dalk sou gebeur nie.”
As ons sterk geloof ontwikkel het, kan ons standvastig bly, maak nie saak watter probleem ons dalk ondervind nie (Sien paragraaf 17)
17. Wat kan ons uit Bob se ondervinding leer? (Sien ook prent.)
17 Bob was standvastig omdat hy lank voordat hy hospitaal toe gegaan het, besluit het om standvastig te bly. Eerstens, hy wou Jehovah baie graag gelukkig maak. Tweedens, hy het ’n goeie studie gemaak van die Bybel en ons Bybelpublikasies om uit te vind wat dit sê oor die heiligheid van lewe en bloed. Derdens, hy was oortuig dat dit blywende voordele sou bring as hy Jehovah se riglyne volg. Ons kan ook ’n standvastige hart hê, maak nie saak watter probleme ons dalk ondervind nie.
Barak en sy manne het moedig agter Sisera se leërmag aangejaag (Sien paragraaf 18)
18. Hoe leer Barak se voorbeeld ons om op Jehovah te vertrou? (Sien prent op voorblad.)
18 Vertrou op Jehovah. Dink aan hoe suksesvol Barak was omdat hy Jehovah se riglyne vertrou het. Al kon daar nie ’n skuld of ’n spies in die hele land gevind word nie, het Jehovah vir Barak gesê om te gaan veg teen Sisera, die Kanaänitiese hoof van ’n leërmag, wat baie wapens gehad het (Rigt. 5:8). Die profetes Debora het vir Barak gesê om teen die berg af te gaan na die gelyke grond om teen Sisera en sy 900 strydwaens te veg. Op die gelyke grond sou dit vir die Israeliete baie moeilik wees om teen die vinnige strydwaens te veg. Selfs al het Barak dit geweet, was hy gehoorsaam. Terwyl die soldate teen die berg Tabor afgekom het, het Jehovah dit baie swaar laat reën. Sisera se strydwaens het in die modder vasgesit, en Jehovah het vir Barak die oorwinning gegee (Rigt. 4:1-7, 10, 13-16). Net so sal Jehovah ons die oorwinning gee as ons op hom vertrou en op die riglyne wat hy voorsien deur sy organisasie. – Deut. 31:6.
WEES VASBESLOTE OM STANDVASTIG TE BLY
19. Hoekom wil jy standvastig bly?
19 Ons sal moet aanhou veg om standvastig te bly solank as wat ons in hierdie wêreld lewe (1 Tim. 6:11, 12; 2 Pet. 3:17). Laat ons vasbeslote wees om nie rondgegooi te word deur vervolging, subtiele druk, die denke van dié wat God se wette ignoreer, bedrog en afleidings nie (Ef. 4:14). Laat ons eerder standvastig bly en altyd aanhou om Jehovah lief te hê en sy gebooie te gehoorsaam. Op dieselfde tyd moet ons redelik wees. In die volgende artikel sal ons bespreek hoe Jehovah en Jesus perfekte voorbeelde van redelikheid is.
LIED 129 Ons sal volhard
a Satan probeer al vanaf Adam en Eva se tyd om mense te oortuig dat hulle vir hulleself moet besluit wat reg en wat verkeerd is. Hy wil hê dat ons daardie selfde gesindheid moet hê teenoor Jehovah se wette en teenoor enige teokratiese riglyne wat ons ontvang. Hierdie artikel sal ons help om seker te maak dat ons nie Jehovah se wette ignoreer soos Satan se volgelinge nie. Dit sal ons ook help om vasbeslote te wees om altyd gehoorsaam aan Jehovah te wees.
b Vir inligting oor hoe ’n Christen God se beskouing van bloed kan gehoorsaam, sien les 39 van die Geniet die lewe vir ewig!-boek.
c Sien die artikel “Beskerm jouself teen valse inligting” op jw.org.