Wie is die Persiese koning Ahasveros wat in die Bybelboek Ester genoem word?

▪ Volgens die boek Ester kies Ahasveros die Joodse maagd Ester om sy koningin te wees, en sy red haar volk van ’n poging tot volksmoord. Daar was lank uiteenlopende opinies oor watter Persiese koning Ahasveros was. Dit lyk egter of die probleem opgelos is deur die ontsyfering van drietalige inskripsies op Persiese monumente. Dit laat min twyfel dat Ahasveros Xerxes I, die seun van Darius die Grote (Hystaspis), was. Die manier waarop die naam Xerxes in die Persiese inskripsie geskryf word, wanneer dit in Hebreeus getranslitereer word, is amper presies dieselfde as die manier waarop dit in die Hebreeuse teks van die boek Ester geskryf word.

Alles wat in die boek Ester oor Ahasveros gesê word, stem ooreen met hierdie gevolgtrekking oor sy identiteit. Uit sy hoofstad Susa (Susan), in Elam, het die Persiese monarg ook oor Medië geheers, en sy ryk het gestrek van Indië tot by die eilande van die Middellandse See (Ester 1:2, 3; 8:9; 10:1). “Dit is alles waar van Xerxes, maar van geen ander Persiese monarg nie”, sê die geleerde Lewis Bayles Paton. “Die karakter van Ahasveros, soos dit in die boek Est[er] uitgebeeld word, stem ook goed ooreen met die verslag oor Xerxes deur Herodotus en ander Griekse geskiedskrywers.”

Watter bewys is daar dat bakstene in eertydse Egipte gemaak is?

▪ Die Bybelboek Eksodus sê dat die Egiptenaars hulle Hebreeuse slawe ingespan het om bakstene te maak. Die slawe moes elke dag ’n voorgeskrewe aantal bakstene van steenklei en strooi maak.—Eksodus 1:14; 5:10-14.

In Bybeltye was die vervaardiging van songedroogde bakstene ’n belangrike bedrywigheid in die Nylvallei. Antieke monumente wat van hierdie materiaal gebou is, bestaan nog steeds in Egipte. Die vervaardigingsproses word uitgebeeld in ’n muurskildery in Rekhmire se grafkelder in Tebe wat uit die 15de eeu VHJ dateer, omstreeks dieselfde tyd toe die gebeure waarvan die boek Eksodus vertel, opgeteken is.

The International Standard Bible Encyclopedia beskryf die toneel in hierdie skildery soos volg: “Water word van ’n poel af gebring; modder word met ’n skoffel gemeng en dan na ’n gerieflike plek vir die baksteenmaker gedra. Die baksteenmaker hou ’n houtvorm teen die grond en druk die modder daarin. Die vorm word dan afgelig, sodat ’n nuutgevormde baksteen agterbly wat in die son droog word. Rye en rye bakstene word gemaak en, wanneer dit droog is, vir gebruik opgestapel. Hierdie proses word nog steeds in die Nabye Ooste gebruik.”

Verskillende papirusdokumente van die tweede millennium VHJ verwys ook na die vervaardiging van bakstene deur slawe, die gebruik van strooi en steenklei en die daaglikse produksiekwota van bakstene wat werkers moes haal.

[Prent op bladsy 22]

Klipreliëf van Xerxes (wat staan) en Darius die grote (wat sit)

[Erkenning]

Werner Forman/Art Resource, NY

[Prent op bladsy 22]

Deel van muurskildery in Rekhmire se grafkelder

[Erkenning]

Erich Lessing/Art Resource, NY