Huweliksgeloftes is vir Jehovah ’n baie ernstige saak. Hy het gesê dat ’n man en ’n vrou mekaar moet aankleef (Mt 19:5, 6). Daar is baie goeie en gelukkige huwelike onder God se volk. Maar geen huwelik is volmaak nie. Daar sal van tyd tot tyd probleme wees. Ons moenie dieselfde opinie as die wêreld hê wat dink dat ’n paartjie wat probleme het, uitmekaar moet gaan of van mekaar moet skei nie. Hoe kan getroude Christene hulle huwelik beskerm?

Kom ons kyk na vyf belangrike stappe.

1. Beskerm jou hart deur dinge te verwerp soos onsedelike vermaak en om te flirt, wat net probleme vir julle huwelik kan veroorsaak. – Mt 5:28; 2Pe 2:14.

2. Versterk jou vriendskap met God en werk die heeltyd hard daaraan om sy hart bly te maak in julle huwelik. – Ps 97:10.

3. Hou aan om die nuwe persoonlikheid aan te trek, en doen daardie klein dingetjies wat wys dat jy vir jou maat omgee en wat sy of haar lewe net ’n bietjie makliker sal maak. – Kol 3:8-10, 12-14.

4. Hou aan om respekvol en sinvol met mekaar te kommunikeer. – Kol 4:6.

5. Kom die huweliksplig met teerheid en liefde na. – 1Kor 7:3, 4; 10:24.

Wanneer Christene hulle huwelik eer, eer hulle Jehovah, die Een wat die huwelik ingestel het.

KYK NA DIE VIDEO ONS MOET “MET VOLHARDING HARDLOOP” – WEES GEHOORSAAM AAN DIE REËLS VAN DIE WEDLOOP, EN BEANTWOORD DAN DIE VOLGENDE VRAE:

• Al begin ’n huwelik goed, watter uitdagings kan daar dalk later wees?

• Hoe kan Bybelbeginsels dié help wat voel dat hulle in ’n liefdelose huwelik is?

• Watter reëls het Jehovah vir die huwelik in plek gestel?

• Wat moet albei die huweliksmaats doen as hulle wil hê dat hulle huwelik suksesvol moet wees?