“Ek is Jehovah. Dit is my naam. Ek gee my heerlikheid aan niemand anders nie, en ook nie my lof aan beelde nie.” – Jesaja 42:8, Nuwe Wêreld-vertaling.

“EK is die HERE, dit is my Naam; en my eer sal Ek aan geen ander gee, of ook my lof aan die gesnede beelde nie.” – Jesaja 42:8, Ou Afrikaanse Bybelvertaling (1953).

God sê vir ons wat sy persoonlike naam is en hy sê ook dat hy nie sy lof of eer met afgode deel nie.

God het homself hierdie persoonlike naam gegee, wat oor die algemeen vertaal word met “Jehovah” in Afrikaans (Eksodus 3:14, 15). a Alhoewel God se naam amper 7 000 keer in die Ou Testament (Hebreeus-Aramese Geskrifte) verskyn, het baie vertalings dit met die titel “HERE” (in hoofletters) vervang. ’n Voorbeeld hiervan is in Psalm 110:1, wat profeties na Jehovah sowel as Jesus verwys. In die Ou Afrikaanse Bybelvertaling (1953) lees ons: “Die Here [Jehovah] het gespreek tot my Here [Jesus]” (Handelinge 2:34-36). Die Nuwe Wêreld-vertaling verwyder enige moontlike verwarring tussen die twee “Here” deur God se naam op die regte plek te sit. Dit sê: “Jehovah het vir my Here gesê: ‘Sit aan my regterhand totdat ek jou vyande ’n voetbank vir jou voete maak.’”

Baie geleerdes dink dat God se naam “Hy laat word” beteken. Hierdie naam kan net van toepassing wees op die ware God omdat hy alleen homself of sy skepping kan laat word wat ook al nodig is om sy doel te bereik.

As ons Skepper en die enigste ware God, verdien Jehovah ons uitsluitlike toegewydheid. Niks en niemand is geregtig op ons aanbidding nie, en dit sluit afgode en beelde in. – Eksodus 20:2-6; 34:14; 1 Johannes 5:21.

Aan die begin van Jesaja hoofstuk 42 het Jehovah die werk van “die een wat [hy] uitgekies het”, voorspel. God het gesê dat hierdie goedgekeurde kneg “geregtigheid vir die nasies [sal] bring” (Jesaja 42:1). God het oor daardie belofte gesê: “Nou kondig ek nuwe dinge aan. Voordat dit gebeur, vertel ek julle daarvan” (Jesaja 42:9). Die profesie oor “die een wat uitgekies” is, het eeue later waar geword toe die Messias, of Christus, gekom het en sy aardse bediening uitgevoer het. – Matteus 3:16, 17; 12:15-21.