Baie mense dink dat Amerikaanse Indiane in die Verenigde State hoofsaaklik in reservate in die landelike deel van die land bly. Maar meer as 70 persent van die mense wat van Indiaanse herkoms is, woon eintlik in stedelike gebiede. Die grootste stad in die Verenigde State, New York, was die gasheer vir “Gateway to Nations”, ’n Indianefees en powwow, van 5-7 Junie 2015. a Toe party van Jehovah se Getuies in New York van dié fees uitvind, het hulle onmiddellik reëlings begin tref om dit by te woon. Waarom?

Jehovah se Getuies vertaal Bybellektuur in honderde tale, insluitende baie Indianetale soos Blackfoot, Dakota, Hopi, Navajo, Odawa en Plains Cree. Die Getuies het dus aantreklike tafels en trollies by die “Gateway to Nations”-geleentheid opgestel om party van hierdie lektuur, insluitende die traktaat You Can Trust the Creator!, daar uit te stal.

Ons amptelike webwerf bevat ook oudio- en video-opnames in die meeste van die bogenoemde tale. Getuies by “Gateway to Nations” het ’n aantal van hierdie opnames gespeel vir nuuskierige besoekers, wat opgemerk het dat die meeste van die ander uitstallings, tekens en opvoerings slegs in Engels of Spaans was.

Talle wat die geleentheid bygewoon het, was nie net beïndruk deur ons pogings om in soveel Indianetale te vertaal nie, maar ook deur ons Bybelonderrigtingswerk in stede en in reservate. Nadat ’n personeellid meer omtrent ons werk uitgevind het, het hy ’n Bybelstudie gevra en gesê: “Ek sien regtig uit na julle besoek en om oor die Bybel te leer!”

Een dowe Indiane-egpaar het na een van ons uitstallings gekyk, maar die Getuies wat daar was, kon nie met hulle kommunikeer nie. Maar toe het ’n Getuie wat gebaretaal geleer het, daar aangekom. Sy het omtrent 30 minute met die egpaar gesels en hulle gehelp om uit te vind waar ’n gebaretaalbyeenkoms van Jehovah se Getuies in hulle omgewing gehou word.

Meer as 50 van Jehovah se Getuies het gehelp met hierdie Bybelonderrigtingswerk, en hulle het meer as 150 stukke lektuur gedurende die driedaagse geleentheid versprei.