“Boeiend, gedagteprikkelend, dinamies.”

“Dit laat die Bybel lewe.”

“Innemend! Ek sien Bybelleesgedeeltes in ’n nuwe lig, al het ek van kleins af daarna geluister.”

Sulke kommentare is algemeen onder diegene wat geluister het na die opname van die Bybelboek Matteus, wat in Engels op jw.org beskikbaar is.

Jehovah se Getuies het in 1978 met hulle eerste opname van die Bybel begin. Mettertyd is opnames van hierdie weergawe van die Bybel, in geheel of gedeeltelik, in 20 tale vrygestel.

Omdat die hersiene uitgawe van die Nuwe Wêreld-vertaling in 2013 vrygestel is, moes die opnames bygewerk word. Die nuwe opnames het egter nie net drie lesers soos die vorige oudio-weergawe nie, maar het eerder ’n ander stem vir elkeen van die meer as 1 000 Bybelkarakters.

Die verskillende lesers help luisteraars om hulle die gebeure voor te stel wat in die Bybelverslae opgeteken is. Hoewel die opnames nie gedramatiseerde Bybelvoorlesings is, wat byklanke en musiek bevat nie, klink dit baie werklik.

’n Projek met soveel lesers vereis goeie beplanning. Navorsers moes eers kyk wie in elkeen van die gedeeltes praat, wat die betekenis van die gedeelte is en watter emosie oorgedra moet word. Byvoorbeeld, wie se stem moet gebruik word as ’n apostel aangehaal word, maar die Bybelverslag nie duidelik toon watter een nie? Tomas se stem sal moontlik gekies word vir ’n kommentaar wat twyfel oordra, en Petrus se stem vir ’n impulsiewe opmerking.

Aandag is ook geskenk aan die ouderdom van die persoon wat aangehaal word. Vir die apostel Johannes as ’n jongmens moes ’n jonger man se stem gebruik word; vir die ouer apostel Johannes is ’n ouer man se stem gebruik.

Daarbenewens moes goeie lesers gevind word. Die meeste word gekies uit diegene wat by die takkantoor van Jehovah se Getuies in die Verenigde State dien. Oudisies word gehou, en potensiële lesers word gevra om ’n sekere paragraaf uit die Ontwaak! voor te berei en te lees. Hulle lees ook dialoog uit die Bybel wat emosies soos woede, hartseer, vreugde of ontmoediging oordra. Hierdie oudisies maak dit moontlik om die vermoë van die lesers te evalueer en te besluit waarvoor hulle stemme die beste gebruik kan word.

Nadat die lesers hulle toewysings ontvang het, gaan hulle na een van die opname-ateljees by Brooklyn of Patterson, waar die gedeeltes wat hulle lees, opgeneem word. ’n Afrigter maak seker dat die leser met die regte stemtoon lees. Die afrigter sowel as die leser gebruik ’n spesiaal saamgestelde dokument wat riglyne voorsien in verband met pousering en beklemtoning in elke leesgedeelte. Die afrigter gebruik ook die opnames van die vorige weergawe van die Nuwe Wêreld-vertaling as ’n gids.

Van die redigering word tydens die opname in die ateljee gedoen. Om die beste opname te kry, moet redigeerders soms woorde of sinne uit verskeie opnames bymekaarsit.

Dit is onseker hoe lank dit sal neem om die volledige hersiene weergawe van die Nuwe Wêreld-vertaling op te neem. Maar soos elke Bybelboek voltooi word, sal dit op jw.org gelaai word, en ’n oudio-ikoon sal langs die naam van die Bybelboek op die blad “Bybelboeke” verskyn.