Teen Januarie 2013 is Die Wagtoring al 40 jaar lank in Groenlands uitgegee. Groenlands is ’n Innuïttaal wat deur net 57 000 mense gepraat word.

Daar is slegs omtrent 150 Getuies van Jehovah in Groenland, maar Die Wagtoring in Groenlands het ’n verspreiding van 2 300. Dit beteken dat die meeste lesers van die Napasuliaq Alapernaarsuiffik, die naam van die tydskrif in Groenlands, nie Getuies is nie.

In ’n televisieonderhoud het die opsiener van die vertaalkantoor in die stad Nuuk verduidelik: “Talle Groenlanders stel baie belang in die Bybel, en daarom lees hulle Napasuliaq Alapernaarsuiffik.”

Toe een van die vertalers wat ’n gebore Groenlander is, gevra is waarom sy van die tydskrif hou, het sy geantwoord: “Ek het persoonlik baat gevind deur die tydskrif te lees. Dit het my byvoorbeeld geleer hoe om ’n goeie, gesonde lewe te lei. Ek het baie gerook, al het ek geweet hoe ongesond dit is. Maar die Bybel sê vir ons dat ons ons liggaam rein moet hou as ons ’n gesonde lewe wil geniet.”

Die program het ook gemeld dat Jehovah se Getuies al sedert die middel-1950’s in Groenland bedrywig is en boeke en brosjures in Groenlands uitgee. Die vertaling word deur Deense sowel as Groenlandse vrywilligers gedoen, en hulle doelwit was nog altyd om die Groenlandse vertaling natuurlik sowel as oorspronklik te laat klink.

’n Man wat al lank ’n Getuie in Groenland is, het gesê: “Ek getuig al 25 jaar lank vir Groenlanders en het gesien hoe voordelig dit is om ons lektuur in hulle taal te hê. In party afgeleë nedersettings, wat net gedurende ’n paar maande van die jaar per boot bereik kan word, is daar mense wat dit geniet om ons tydskrifte te lees, en daarom stuur ons tussen ons seldsame besoeke gereeld vir hulle briewe en lektuur.”

Sedert Januarie 2013 word ’n gereelde studie-uitgawe en ’n publieke uitgawe van Die Wagtoring in Groenlands uitgegee. Hierdie uitgawes kan ook onder die gewel “Publikasies” van jw.org/af gelees en afgelaai word deur die taal Groenlands te kies en dan op “Soek” te klik.