Op 13 Januarie 2024 het broer Jeffrey Winder, ’n lid van die Bestuursliggaam, die Nuwe Wêreld-vertaling van die Christelike Griekse Geskrifte in Chokwe vrygestel. Die aankondiging is gemaak gedurende ’n spesiale program wat by die takkantoor in Luanda, Angola, gehou is. Altesaam 187 broers en susters het die program in persoon bygewoon, en nog 353 427 mense het deur middel van videoverbinding ingeskakel. Dit het 1 644 broers en susters wat Chokwe praat, ingesluit. Gedrukte kopieë van die Christelike Griekse Geskrifte is gegee aan baie mense wat die program bygewoon het. Die vrystelling kon ook in digitale formaat afgelaai word.

Omtrent driemiljoen mense in Angola, die Demokratiese Republiek van die Kongo en Zambië praat Chokwe. Op die oomblik dien 462 broers en susters in tien Chokwe-gemeentes regdeur Angola. Nog 734 broers en susters dien in 21 Chokwe-gemeentes in die Demokratiese Republiek van die Kongo.

Gedurende die vrystelling het broer Winder in sy toespraak genoem dat die Nuwe Wêreld-vertaling van die Christelike Griekse Geskrifte God se persoonlike naam, Jehovah, 237 keer gebruik. Een broer het gesê: “Romeine 10:13 sê dat ‘elkeen wat die naam van Jehovah aanroep, gered sal word’. Maar party Bybelvertalings in Chokwe is nie duidelik oor wat dit beteken nie. So ek sien daarna uit om die Christelike Griekse Geskrifte te gebruik om mense te help verstaan hoekom dit so belangrik is om Jehovah se naam te gebruik sodat hulle gered kan word. Wat ’n wonderlike geskenk!”

Ons weet dat die Nuwe Wêreld-vertaling van die Christelike Griekse Geskrifte in Chokwe nog baie mense sal help om oor Jehovah te leer en hom met hulle hele hart en al hulle krag lief te hê. – Markus 12:33.