Op Sondag 18 September 2022 het broer Hamilton Vieira, ’n lid van die Takkomitee in Brasilië, die aankondiging gemaak dat die volledige Nuwe Wêreld-vertaling van die Bybel in Brasiliaanse Gebaretaal vrygestel is. Dit is nou beskikbaar op jw.org en in die JW Library Sign Language-app. Meer as 36 300 mense het na die program gekyk, wat uitgesaai is vanaf die ouditorium by die takkantoor in Brasilië.

Dit is die eerste volledige vertaling van die Bybel in Brasiliaanse Gebaretaal en slegs die derde volledige vertaling van ’n Bybel in gebaretaal in die wêreld. Die vertaalprojek het in 2006 met die Evangelie van Matteus begin. Daarna is die Bybelboeke onmiddellik beskikbaar gemaak nadat dit vertaal is.

Angellyca, ’n dowe suster, het gesê: “In die verlede het ek die Bybel in Portugees probeer lees, maar dit was vir my moeilik om dit te verstaan. Omdat die Bybel in Brasiliaanse Gebaretaal beskikbaar is, verstaan ek dit nou so goed dat dit voel asof ek deel van die verslae is!”

In 1982 het Jehovah se Getuies die eerste gebaretaalgemeente in Rio de Janeiro gevorm. Vandag dien omtrent 9 500 verkondigers in 246 gemeentes, 337 groepe en 63 tentatiewe groepe wat Brasiliaanse Gebaretaal gebruik.

Die vrystelling van hierdie Bybel toon Jehovah se liefde vir ons dowe broers en susters. Ons bid dat hierdie kosbare geskenk baie meer mense sal help om oor Jehovah en sy Seun te leer en die weg na ewige lewe te vind. – Johannes 17:3.