Op Dinsdag 29 Augustus 2023 is die hersiene Nuwe Wêreld-vertaling in Lingala vrygestel. En dele van die Nuwe Wêreld-vertaling is in Alur, Kinande, Kipende, Kisonge, Kituba en Uruund vrygestel. Broer Mark Sanderson, ’n lid van die Bestuursliggaam, het met die 75 715 mense gepraat wat die ‘Wees geduldig’!-streekbyeenkoms by die Martyr’s-stadion in Kinshasa, die Demokratiese Republiek van die Kongo, bygewoon het. Nog 219 457 mense het na die program deur middel van videoverbinding by 53 Byeenkomssale en ander plekke in die takkantoor se gebied gekyk. Gedrukte kopieë van die hersiene Nuwe Wêreld-vertaling in Lingala en die Nuwe Wêreld-vertaling van die Christelike Griekse Geskrifte in Kisonge is uitgedeel. Gedrukte kopieë van die ander vertalings sal later beskikbaar wees. Die digitale uitgawes van al die vertalings kon onmiddellik afgelaai word. Die vrystellings was as volg:

• Omtrent 1 750 000 mense praat Alur, hoofsaaklik in Mahagi

• 1 609 verkondigers dien in 45 Alur-gemeentes

• Jehovah se Getuies het in 2013 begin om publikasies in Alur te vertaal

• Die vertaalkantoor (RTO) is in Bunia

• Omtrent 903 000 mense praat Kinande in Ituri en Noord-Kivu

• 4 793 verkondigers dien in 78 Kinande-gemeentes

• Jehovah se Getuies het in 1998 begin om publikasies in Kinande te vertaal

• Die RTO is in Butembo

• Omtrent 2 miljoen mense praat Kipende in die provinsies Kasai, Kwango en Kwilu

• 3 349 verkondigers dien in 88 Kipende-gemeentes

• Jehovah se Getuies het in 1996 begin om publikasies in Kipende te vertaal

• Die RTO is in Kikwit

• Omtrent 1 miljoen mense praat Kisonge, hoofsaaklik in die provinsie Lomami

• 1 043 verkondigers dien in 31 Kisonge-gemeentes

• Jehovah se Getuies het in 2006 begin om publikasies in Kisonge te vertaal

• Die vertaalkantoor is in Kinshasa

• Kituba word deur meer as 12 miljoen mense gepraat in die suidelike deel van die Republiek van die Kongo asook in Angola en Gaboen

• 2 137 verkondigers dien in 30 Kituba-gemeentes

• Die RTO vir Kituba is in 2019 in Pointe-Noire oopgemaak

• Meer as 40 miljoen mense praat Lingala

• 74 023 verkondigers dien in 1 266 Lingala-gemeentes

• Jehovah se Getuies het in die 1960’s begin om publikasies in Lingala te vertaal

• Die Nuwe Wêreld-vertaling in Lingala is in 2009 vrygestel

• Die vertaalkantoor is in Kinshasa

• Omtrent 153 000 mense praat Uruund, hoofsaaklik in die provinsie Lualaba

• 553 verkondigers dien in 19 Uruund-gemeentes

• Jehovah se Getuies het in 1994 begin om publikasies in Uruund te vertaal

• Die RTO is in Kolwezi

Hierdie nuwe en hersiene vertalings sal die broers en susters baie help wat in die gebiede werk waar hierdie tale gepraat word. Een verkondiger wat Kituba praat, het gesê: “Ons het gesien dat mense in ons gebied dikwels nie na ons luister nie omdat ons nie publikasies in hulle taal gebruik het nie. Byvoorbeeld, hulle het nie die tekste verstaan as ons dit in Frans gelees het nie. Selfs mense wat nie goed kan lees nie, kan na hierdie nuwe vertaling luister en deur God se Woord gehelp word.” Een leser het oor die voordele van die hersiene Nuwe Wêreld-vertaling in Lingala gesê: “Om sulke eenvoudige sinne te hê om in velddiens te gebruik, sal wees soos om ’n skat te deel met dié wat ons ontmoet.”

Ons is oortuig dat Jehovah die gebruik van hierdie nuwe vertalings sal seën terwyl ons broers en susters dié bereik wat “gretig [is] om die woord van God te hoor”. – Handelinge 13:7.