Op 21 April 2024 het broer Dean Jacek, ’n lid van die Takkomitee in die Filippyne, die Bybelboek Matteus in Filippynse Gebaretaal vrygestel. Dit het gebeur gedurende ’n spesiale program wat by die takkantoor in Quezon City gehou is. Altesaam 413 broers en susters het die program in persoon bygewoon. Nog 3 998 broers en susters het regoor die land deur middel van videoverbinding ingeskakel. Die vrystelling was dadelik beskikbaar om op jw.org en in die JW Library Sign Language-app afgelaai te word.

Daar word geskat dat ten minste 500 000 mense Filippynse Gebaretaal gebruik. Die eerste Filippynse Gebaretaal-gemeente is in 1999 in Quezon City gevorm, en Bybelpublikasies is in 2011 vir die eerste keer in hierdie taal vertaal. Vandag dien meer as 3 000 broers en susters in 72 gebaretaalgemeentes en -groepe regoor die Filippyne.

Dit is die eerste volledige Bybelboek wat al ooit in Filippynse Gebaretaal vertaal is. Een dowe broer het gesê: “Voor hierdie vrystelling het ons net sekere verse van die boek Matteus in ons taal gehad. Dit was soos om net sekere stukke van ’n groot legkaart te hê. Maar nou kan ons die hele prentjie sien!” ’n Ouerman wat in ’n Filippynse Gebaretaal-gemeente dien, het bygevoeg: “Daar is baie beginsels in die boek Matteus wat ons help wanneer ons na die gemeente omsien en opbou. Byvoorbeeld, Matteus 5:23, 24 moedig ons aan om vrede met ons broers te soek wanneer daar ’n meningsverskil ontstaan. Ek dank Jehovah dat hy hierdie baie belangrike lesse in ons taal beskikbaar maak.”

Ons is baie bly oor die vrystelling van die boek Matteus in Filippynse Gebaretaal, wat baie meer opregte mense sal help om by God se Woord baat te vind. – Matteus 7:24, 25.