27 JUNIE 2023
RUSLAND

Broer Skwortsof en Tibi word skuldig bevind

SPEEL

Op 20 Junie 2023 het die Taganrog-stadshof in die Rostof-streek broer Aleksandr Skwortsof en Waleri Tibi skuldig bevind. Aleksandr is tot sewe jaar tronkstraf gevonnis. Hy is al sedert 7 Desember 2021 in aanhouding voor sy verhoor en sal in aanhouding bly. Waleri is ’n opgeskorte tronkvonnis van ses jaar gegee. Hy is al sedert 18 Mei 2022 in aanhouding en is uit die tronk vrygelaat.

Profiel

Aleksandr Skwortsof

Gebore: 1962 (Taganrog)

Agtergrond: Het as ’n sweiser gewerk

Het in 1983 met Larisa getrou. Hulle het twee dogters

Larisa het die Bybel saam met Jehovah se Getuies begin studeer en is in 1996 gedoop. Aleksandr was bly om te leer van die Bybel se hoop van ’n wêreld sonder onregverdigheid. Gedoop in 1997

Is voorheen in 2015 skuldig bevind en het ’n opgeskorte tronkvonnis van vyf en ’n half jaar ontvang

Persoonlike kommentare van Aleksandr se vrou, Larisa a

Wat help jou man om die omstandighede in die tronk te hanteer?

In die afgelope jaar is Aleksandr na 13 verskillende tronkselle geskuif. Hoewel dit nie altyd maklik vir hom is om ’n goeie verhouding te hê met die mense met wie hy ’n tronksel deel nie, werk hy baie hard daaraan om met almal oor die weg te kom. Hy noem dikwels dat om vir Jehovah te bid, om sy Bybel te lees en om die briewe wat hy ontvang, te lees, hom help om geestelik sterk te bly. Om nie by sy familie en vriende te wees nie, is vir hom die moeilikste deel, maar Jehovah gee vir hom innerlike vrede.

Hoe het hierdie ondervinding jou verhouding met Jehovah geraak?

Ek het vandag baie meer vertroue in Jehovah as ooit tevore. Om te sien hoe Hy my en my man ondersteun, oortuig my van Sy liefde vir ons. Wanneer ek sien hoe baie ons broers en susters ons help en ondersteun, bring dit trane in my oë.

Waleri Tibi

Gebore: 1977 (Nowopokrofka , die Krim)

Agtergrond: Het as ’n trokbestuurder gewerk

Het die Bybel saam met Jehovah se Getuies begin studeer nadat hy geleer het wat God se naam is. Gedoop in 2004

Het met Kristina getrou in 2012

Persoonlike kommentare van Waleri se vrou, Kristina b

Hoe hanteer Waleri die onsekerheid van die lewe in aanhouding?

Waleri bid gereeld vir kalmte en krag om die geraas en al die mense in sy sel te hanteer. Die mense wat saam met hom die sel deel, het opgelet hoe sterk en kalm hy is. Hulle vra gereeld vir hom: “Hoe kry jy dit reg om so kalm te bly? Jy is die gelukkigste mens hier!” Waleri is bly dat hy soveel goeie gesprekke met hierdie mans gehad het. Dit het alles gebeur omdat Jehovah hom help om Bybelbeginsels toe te pas. Hulle vra hom gereeld vir raad. Hy voel Jehovah se beskerming omdat hy met respek behandel word.

Watter Bybelteks het vir jou spesiale betekenis gedurende hierdie moeilike tyd?

Gedurende hierdie vervolging het Spreuke 3:6 my gehelp om meer op Jehovah te vertrou. Dit sê daar: “Neem hom in ag in alles wat jy doen, en hy sal jou paaie gelykmaak.” Net Jehovah het al die wysheid. Wanneer ek ’n probleem het, het ek geleer om dadelik te kyk wat die Bybel sê oor Jehovah se beskouing van die saak. Maak nie saak wat al gebeur het nie, Jehovah het nooit opgehou om na my om te sien nie.

Ons dank Jehovah vir sy liefde en leiding, wat dit vir ons moontlik maak om elke uitdaging wat na ons kant toe kom, te kan hanteer. – Psalm 5:12.

Tydlyn

20 Maart 2021

Die Skwortsof-gesin se huis word deursoek
7 Desember 2021

Die Skwortsof-gesin se huis word vir ’n tweede keer saam met 29 ander Getuies van Jehovah se huise in Taganrog deursoek. Broer Skwortsof is krimineel aangekla en in tydelike aanhouding gesit
8 Desember 2021

Aleksandr word in aanhouding voor sy verhoor gesit
29 Maart 2022

Kriminele saak word teen Waleri gemaak
31 Maart 2022

Speurders kombineer die sake teen Aleksandr en Waleri
18 Mei 2022

Waleri word gearresteer en in tydelike aanhouding gesit
26 Mei 2022

Waleri word in aanhouding voor sy verhoor gesit
6 Desember 2022

Kriminele verhoor begin
20 Junie 2023

Aleksandr word tot sewe jaar tronkstraf gevonnis. Waleri is ’n opgeskorte tronkvonnis van ses jaar gegee

a b Gedurende die voorbereiding van hierdie artikel was broer Skwortsof en broer Tibi in aanhouding voor hulle verhoor en was dit nie moontlik om persoonlike kommentare by hulle te kry nie.

Sien ook

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE