25 JULIE 2023
RUSLAND

Getuies in Wladiwostok word versterk deur gebed en ’n goeie gesindheid

SPEEL

Die Perworetjenski-distrikshof van Wladiwostok sal binnekort sy uitspraak gee in die saak teen suster Nina Astwatsatoerowa, Jelena Barmakina, Loedwiga Katanaewa, Jekaterina Tregoeba en Jelena Tsorn en broer Igor Lontjakof en Joeri Redozoebof. Die aanklaer het nog nie ’n spesifieke vonnis aangevra nie.

Profiel

Jelena Barmakina

Gebore: 1967 (Tsjerepanowo, Nowosibirsk-streek)

Agtergrond: Werk as ’n fotograaf

Ontmoet Jehovah se Getuies nadat haar ma en broer die Bybel begin studeer. Gedoop in 2000

Trou met Dmitri in 2006. Hy was in 2023 tot agt jaar tronkstraf gevonnis

Persoonlike kommentare

Wat het jou vertroos en versterk gedurende hierdie baie moeilike tyd?

Nadat ons huis deursoek is, is ek en my man albei gearresteer, en Dmitri is in aanhouding geplaas. Ek het nie geweet wat om sonder my man te doen en hoe om hom te help nie. Die eerste paar dae was dit vir my baie moeilik om te bid omdat my emosies so sterk was. Maar ek het onthou dat ek die gebede van Jehovah se knegte in die Bybel kan lees wanneer ek oorweldig voel en nie weet waarvoor om te bid nie. Dan sal Jehovah daardie gebede beskou asof dit van my af kom (Romeine 8:26). Dit het my baie vertroos gedurende ’n baie moeilike tyd.

Igor Lontjakof

Gebore: 1977 (Saratof, Saratof-streek)

Agtergrond: Werk as ’n telekommunikasie-operateur vir die posdiens

Sy ma het een van Jehovah se Getuies geword terwyl Igor op kollege was. Om haar vreugde te sien het hom beweeg om die Bybel te studeer. Gedoop in 2008

Persoonlike kommentare

Watter vers in die Bybel het jou veral gehelp?

Die fisiese, emosionele en finansiële uitdagings wat deur hierdie verhoor veroorsaak is, het my laat dink aan hoe goed my lewe eers was. Ek het tot Jehovah gebid oor hoe ek voel. Ek het later oor Prediker 7:10 nagedink, waar dit sê: “Moenie vra: ‘Hoekom was die vroeëre dae beter as hierdie dae?’ nie, want dit is nie uit wysheid dat jy dit vra nie.” Daardie vers het my gehelp om stil te staan en te dink aan al die seëninge wat ek in my lewe het: my ma, my verloofde en my broers en susters in die gemeente. Hulle almal ondersteun my. En die belangrikste is, ek weet Jehovah is met my. Nou sê ek gereeld vir Jehovah dankie vir al hierdie seëninge wanneer ek bid in plaas daarvan om hom net van my probleme te vertel.

Joeri Redozoebof

Gebore: 1972 (Komsomolsk aan die Amoer, Chabarowsk-gebied)

Agtergrond: Het as ’n kind geleer om te skilder. Word ’n kuns-instrukteur

Trou met Anastasija in 1998. Hulle het drie dogters

Hulle het as ’n paartjie die Bybel begin lees. Ontmoet Jehovah se Getuies en was baie bly toe hulle vrae uit die Bybel beantwoord is. Anastasija is in 2003 gedoop, en Joeri in 2004

Persoonlike kommentare

Hoe het gebed jou gehelp om te volhard?

Vandat hierdie vervolging begin het, het my gebede baie meer spesifiek geword. En ek is vasbeslote om aan te hou om gereeld tot God te bid, maak nie saak wat gebeur nie. Een van die dinge wat ek Jehovah vra, is om kalm te bly. Hierdie gebede het my en my familie gehelp om nie te angstig of mismoedig te word nie. Ek kyk eerder na my situasie en beskou dit as ’n voorreg om Jehovah te dien. My verhouding met hom was nog nooit so sterk nie.

Jekaterina Tregoeba

Gebore: 1991 (Wladiwostok, Primorje-gebied)

Agtergrond: Is ’n Engelse onderwyseres

Haar ouma het vir haar My boek met Bybelverhale gelees toe sy ’n kind was. Toe sy 15 jaar oud was, het sy die Bybel begin studeer. Gedoop in 2008

Persoonlike kommentare

Wat is een les wat jy uit hierdie ondervinding geleer het?

Een van die grootste uitdagings vir my was om my vreugde te behou ten spyte van die moeilike tye. Ek het gelees van broers en susters wat in aanhouding of in die tronk was, en dit het gelyk asof hulle al hoe gelukkiger was al was hulle omstandighede al hoe moeiliker. Maar ek kon eenvoudig nie verstaan waaroor ek gelukkig moes wees nie. Dit het my regtig gehelp om na te dink oor die woorde van Koninkrykslied nommer 111 met die titel “Ons redes tot vreugde”. Hierdie lied sê: “Ons blydskap is nie oppervlakkig,/ Gods Woord is die rede daarvoor.” Ek het besef dat ek die Bybel meer moet studeer en meer gereeld vir vreugde moet bid. En dit is wat ek nou doen.

Jelena Tsorn

Gebore: 1972 (Wladiwostok, Primorje-gebied)

Agtergrond: Het as ’n onderwyseres en administrateur by ’n kleuterskool gewerk

Het antwoorde gekry op haar vrae oor swaarkry en die dood by een van haar bure wat ’n Getuie van Jehovah is. Gedoop in 2011

Persoonlike kommentare

Hoe kry jy dit reg om positief te bly?

Wanneer ek terugdink aan die laaste paar jare, is ek daarvan oortuig dat Jehovah alles onder beheer het. Hy is altyd bewus van wat gebeur. Ek herinner myself dikwels aan Jehovah se belofte in Jesaja 54:17: “Geen wapen wat gemaak word om jou aan te val, sal enige sukses hê nie . . . Dit is die erfenis van die knegte van Jehovah.” Dit help my om te dink aan die toekoms en om aan te hou om dankbaar te wees vir die liefde wat my broers en Jehovah aan my bewys.

Dit vertroos ons baie om te weet dat Jehovah aanhou om sy regverdige knegte te seën, om vir hulle te sorg en om ‘hulle met sy goedkeuring te omring’. – Psalm 5:12.

Tydlyn

6 Augustus 2019

Jelena Barmakina word krimineel aangekla
8 Junie 2020

Kriminele saak word teen Nina, Loedwiga en Jelena Tsorn gemaak
17 Junie 2020

Kriminele verhoor teen Jelena Barmakina begin
9 Julie 2020

Huise van Nina, Loedwiga, Jelena Tsorn en Joeri word deursoek. Joeri word weggeneem en ondervra. Nina, Loedwiga en Jelena Tsorn word onder reisbeperkings geplaas
4 September 2020

Igor word krimineel aangekla
8 September 2020

Jekaterina word krimineel aangekla
29 September 2020

Saak teen Jelena Barmakina word terugverwys na die aanklaer as gevolg van onvoldoende bewyse van ekstremisme
11 Augustus 2021

Joeri word krimineel aangekla. Saak teen Jelena Barmakina word weer begin, en al die sake word gekombineer
28 September 2022

Kriminele verhoor begin

a b Persoonlike kommentare van suster Astwatsatoerowa en Katanaewa is nie beskikbaar nie.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE