27 MAART 2024
RUSLAND

Hulle bly vol vertroue, voorbereid en positief

SPEEL

Die Leninski-distrikshof van Barnaoel in die Altai-gebied sal binnekort sy uitspraak gee in die saak teen broer Yuriy Kolotinskiy, Michail Resjetnikof en Anatoli Saritjef. Die aanklaer het nog nie ’n spesifieke vonnis aangevra nie.

Profiel

Yuriy Kolotinskiy

Gebore: 1955 (Moldowa)

Agtergrond: Het vir mynmaatskappye as ’n operateur van groot masjiene gewerk

Trou met Natalija in 1977

Het gewonder hoekom daar soveel swaarkry is. Het duidelike antwoorde uit die Bybel gekry nadat hy saam met Jehovah se Getuies studeer het. Yuriy en Natalija is albei in 1995 gedoop

Persoonlike kommentare

Watter Bybelverslag het jou gehelp om vertroue in Jehovah se ondersteuning te hê?

Ek dink dikwels aan toe die Israeliete uit Egipte gegaan het. Jehovah het hulle die heeltyd gelei en beskerm terwyl hulle in die wildernis was. Ek voel dat hy vir my dieselfde doen. Elke keer wanneer ek hof toe moet gaan, verbeel ek my dat Jehovah voor my ingaan. Wanneer ek sy ondersteuning voel, oortuig dit my dat hy my liefhet en dat hy my die krag sal gee om voort te gaan en dat ek lojaal sal kan bly, maak nie saak wat gebeur nie. My geloof is sterker as ooit tevore. Ek weet dat wat ek doen, reg is, en ek is bereid om te doen wat ek ook al kan om Jehovah se naam te verdedig.

Michail Resjetnikof

Gebore: 1949 (Maksiner, Kirof-streek)

Agtergrond: Het meer as 50 jaar lank as ’n bus- en trokbestuurder gewerk

Het ’n seun en ’n dogter saam met sy eerste vrou grootgemaak. Sy het later aan kanker gesterf. Trou met Antonina in 2021

Het vrae oor die Bybel gehad, maar het nie antwoorde by sy kerk gekry nie. Was bly om oor die waarheid te leer deur sy studie saam met Jehovah se Getuies. Gedoop in 2000

Persoonlike kommentare

Hoe het dit jou gehelp om voorbereid te wees vir vervolging?

Toe hulle begin het om ons broers en susters te arresteer en in die tronk te sit, het ek begin bid vir Jehovah om my die wysheid en selfbeheersing te gee sodat ek voorbereid kon wees. Om Jehovah se hulp te ondervind het oor en oor aan my bewys dat hy altyd gebede op net die regte tyd beantwoord. Ek twyfel glad nie daaraan dat hy my help nie. Daarom is ek nie bang vir watter uitspraak die hof ook al in my saak sal lewer nie. Ek weet dat ek met Jehovah se hulp lojaal sal kan bly.

Anatoli Saritjef

Gebore: 1949 (Karpowo, Altai-gebied)

Agtergrond: Het as ’n grafiese ontwerper gewerk voordat hy afgetree het

Trou met Nadezjda in 1990. Hulle het ’n seun

Jehovah se Getuies het met hom gepraat terwyl hy van ’n operasie herstel het. Was baie bly om te leer van Jehovah se beloftes om geweld en swaarkry te beëindig. Nadezjda is in 2001 gedoop, en Anatoli in 2002

Persoonlike kommentare

Wat help jou om positief te bly?

Ek dink oor wat in 1 Petrus 3:14 geskryf is: “Maar selfs as julle ter wille van regverdigheid sou ly, is julle gelukkig.” Die Fariseërs het die apostels vervolg omdat hulle geweier het om op te hou preek. Die apostels het vernedering as gevolg van Jesus se naam verduur, en hulle het dit gesien as ’n rede om vreugdevol te wees. Ek wil hulle voorbeeld volg. Ek sien geen rede om mismoedig te wees omdat ek vervolg word nie. Dit vertroos my eerder baie om te weet dat ek die voetstappe van die vroeë Christene en Jesus Christus navolg.

Ons is dankbaar vir broers soos hierdie, wat sulke goeie voorbeelde is van mense wat geloof in en vertroue op Jehovah het. Ons is oortuig dat hulle sal aanhou om baat te vind by Jehovah se lojale liefde en getrouheid. – Psalm 25:10.

Tydlyn

25 Mei 2021

Kriminele saak word teen Michail gemaak
27 Mei 2021

Michail se huis word deursoek. Hy en Antonina word ondervra. Michail word onder reisbeperkings geplaas
6 Oktober 2022

Kriminele saak word teen Anatoli en Yuriy gemaak en word met Michail se saak gekombineer
7 Oktober 2022

Anatoli en Yuriy word onder reisbeperkings geplaas
19 Januarie 2023

Kriminele verhoor begin

Sien ook

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE