9 FEBRUARIE 2024
RUSLAND

Hulle het moed en vertrou op Jehovah

SPEEL

Die Blagowesjtsjensk-stadshof van die Amoer-streek sal binnekort sy uitspraak gee in die saak teen suster Kristina Golik, Jekaterina Olsjefskaja, Marija Mjasnikowa en Walentina Jermilowa. Die aanklaer het nog nie ’n spesifieke vonnis aangevra nie.

Profiel

Kristina Golik

Gebore: 1992 (Oekraïne)

Agtergrond: Het grafiese kuns en webontwerp gestudeer

Vyfde geslag van Jehovah se Getuies. Gedoop in 2006

Trou met Dmitri in 2012. Hy is in Junie 2021 skuldig bevind en dien ’n tronkstraf van ses jaar en twee maande uit

Persoonlike kommentare

Is daar ’n Bybelteks wat jou help om vreugdevol te bly?

Toe ek en Dmitri vir die eerste keer weg van mekaar geneem is, het ek nie regtig geweet hoe om oor hierdie ongeregtigheid te voel nie. Ek het regtig sy vertroosting en ondersteuning gemis. Ek het Jehovah gesmeek om my te help. In my Bybellees het ek Psalm 17 gekry. Vers 15 het my veral geraak: “Maar in regverdigheid sal ek u gesig sien. Ek is tevrede om wakker te word in u teenwoordigheid.” Wanneer ek nou elke oggend wakker word, herinner ek myself daaraan dat my God, Jehovah, beter as enige iemand weet hoe om my die vertroosting en aanmoediging te gee wat ek nodig het. Ten spyte van my probleme kan ek altyd ’n rede vind om te glimlag.

Jekaterina Olsjefskaja

Gebore: 1984 (Blagowesjtsjensk)

Agtergrond: Trou met Anton in 2010. Hulle seun is vier jaar oud

Anton en haar pa, Sergei Afanasijef, is in Desember 2022 skuldig bevind en dien tronkstrawwe van meer as ses jaar uit

Persoonlike kommentare

Hoe het jou verhouding met Jehovah sterker geword gedurende hierdie moeilike tye?

Die afgelope vyf jaar is ek uitgeput deur die verhore in verband met die kriminele sake teen my pa, my man en nou ook in my eie saak. Ek kan ook tronk toe gestuur word, en as dit sou gebeur, sal ons vier-jarige seun sonder sy ouers wees. Ten spyte hiervan voel ek soos Job toe hy in Job 42:5 gesê het: “Tot nou toe het ek net van u gehoor, maar nou sien ek u met my eie oë.” Al is my situasie moeilik en al kan my man nie hier by my wees nie, voel ek dat Jehovah nader as ooit tevore aan my is. Anton het eenkeer vir my gesê: “Selfs as ek tronk toe gaan en nie vir jou kan sorg nie, sal jy sien hoe Jehovah die beste gesinshoof is. Hy sal vir jou sorg.” En Jehovah het sulke goedheid aan my bewys. Hy luister nie net na jou en voel jammer vir jou nie. Hy voorsien daadwerklik in my emosionele en fisiese behoeftes, dikwels selfs voordat ek vra.

Marija Mjasnikowa

Gebore: 1994 (Tjernigofka, Amoer-streek)

Agtergrond: Het as ’n kantoorbestuurder gewerk

Marija se ma het die Bybel met haar studeer. Is beïndruk deur die feit dat Bybelprofesieë vervul is en die hoop om vir ewig te lewe. Gedoop in 2006

Trou met Nikolai in 2021

Persoonlike kommentare

Wat help jou om ten spyte van die moeilike tye ’n positiewe gesindheid te behou?

Ek probeer om moeilike tye nie as iets negatiefs te sien nie, maar eerder as ’n geleentheid om my Christelike eienskappe te verbeter. Goud word teen ’n hoë temperatuur gesuiwer. Die moeilike tye wat ek nou deurmaak, help my om eienskappe te ontwikkel wat vir Jehovah kosbaar is en wat my in die toekoms sal help. Ek onthou ook wat dit in 1 Johannes 2:17 sê: “Die wêreld en sy begeertes gaan verby, maar die een wat die wil van God doen, bly vir ewig.” Alles wat nou gebeur, is tydelik. Omdat ek dit weet, gee dit my die krag om aan te gaan.

Walentina Jermilowa

Gebore: 1970 (Sjimanofsk, Amoer-streek)

Agtergrond: Het as ’n laboratoriumtegnikus gewerk

Trou met Sergei in 1995. Hulle het een seun

Was baie bly om te leer oor die hoop van die opstanding. Gedoop in 2009

Sergei is in Desember 2022 skuldig bevind en dien ’n tronkstraf van ses jaar en drie maande uit

Persoonlike kommentare

Watter les het jy uit hierdie moeilike ondervinding geleer?

Ek het die waarde daarvan gesien om nie te veel op my eie omstandighede te fokus nie. Ek herinner myself eerder dat die belangrikste ding is om Jehovah se naam te heilig. Baie mense beskou dit as ’n eer om hulle lewe vir hulle land te gee. Ek voel selfs meer geëerd om Jehovah se naam te verdedig. Ek wil vir Jehovah net my heel beste gee en hom verheerlik. En ek weet dat hy my nooit in die steek sal laat nie.

Ons is dankbaar vir die voorbeelde wat hierdie susters stel om op Jehovah te vertrou. En ons weet dat Jehovah sal aanhou om vir hulle te sorg en hulle ryklik te seën. – Psalm 27:3.

Tydlyn

20 Julie 2018

Huise word deursoek
22 Julie 2021

Al vier susters word krimineel aangekla
27 Julie 2021

Kristina en Marija word onder reisbeperkings geplaas
3 Augustus 2021

Jekaterina word onder reisbeperkings geplaas
4 Augustus 2021

Walentina word onder reisbeperkings geplaas
26 Mei 2023

Kriminele verhoor begin

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE