29 MAART 2023 | BYGEWERK: 18 APRIL 2023
RUSLAND

JONGSTE NUUS – BROERS IN DIE TRONK | Ervaar Jehovah se ondersteuning in aanhouding

SPEEL

Op 17 April 2023 het die Achtoebinski-distrikshof van die Astrakan-streek broer Rinat Kiramof, Sergei Korolef en Sergei Kosjanenko skuldig bevind. Hulle is elkeen tot sewe jaar tronkstraf gevonnis. Al drie broers was sedert November 2021 in aanhouding voor hulle verhoor, en hulle is nog steeds in die tronk.

Profiel

Rinat Kiramof

Gebore: 1987 (Moskou, Moskou-streek)

Agtergrond: Was besig om te studeer om ’n webontwikkelaar te word voordat hy gearresteer is. Is ’n talentvolle musikant. Het pos afgelewer as deel van sy alternatiewe burgerlike diens

Het die waarheid by sy ma geleer. Was beïndruk deur die liefde en eenheid onder Jehovah se Getuies. Gedoop in 2001

Trou met Galina in 2009

Persoonlike kommentare van Rinat se vrou, Galina a

Wat help Rinat om te volhard terwyl hy in die detensiesentrum in aanhouding is?

Rinat het dit as ’n doelwit gestel om vir elke broer en suster wat in die tronk is, by naam te bid. Ek gee elke maand vir hom ’n lys met name van diegene wat regoor die wêreld in die tronk is weens hulle geloof. Hy maak tyd om oor elkeen van hulle te bid, en dit versterk sy eie verhouding met Jehovah en help hom om nie te veel op sy eie probleme te fokus nie. Ons herinner ook mekaar waarom dit so belangrik is dat ons moet volhard: Ons gee ’n goeie getuienis en ondersteun Jehovah se soewereiniteit. Rinat het die volgende in ’n brief geskryf: “Dit maak nie saak hoe sterk ons vyand lyk nie, met ons Vader se hulp sal ons oorwin. Maar oorwinning beteken nie noodwendig vryheid nie. Vir ons beteken oorwinning om tot die einde toe getrou te bly.”

Hoe het jy gevoel dat Jehovah jou ondersteun?

Rinat het iets in ’n brief geskryf wat baie waar is: “Omdat ek nie nou vir jou kan sorg nie, het Jehovah self daardie verantwoordelikheid aangeneem.” En ek het die kragtige ondersteuning van Jehovah se gees gevoel vandat alles begin het. Psalm 91:1 belowe: “Elkeen wat in die geheime plek van die Allerhoogste woon, sal in die skaduwee van die Almagtige bly.” In die verlede het ek gelees oor hierdie “geheime plek”, maar nou sien ek Jehovah se beskerming meer as ooit tevore. Dit help my om ten volle op hom te vertrou en om met vreugde te volhard.

Sergei Korolef

Gebore: 1973 (Penza, Penza-streek)

Agtergrond: Hou daarvan om foto’s te neem en meubels te maak

Hy het sy negatiewe opinie van godsdiens verander nadat hy met Jehovah se Getuies begin assosieer het en oor die Skepper geleer het. Gedoop in 1996

Trou met Jekaterina in 2005

Persoonlike kommentare

Hoe is jou verhouding met Jehovah gedurende hierdie tyd versterk?

Dit is ’n uitdaging om nie negatief te raak oor wat gebeur terwyl jy in aanhouding is nie. My volharding, geloof, hoop en liefde word ten volle getoets. Wat my die meeste help, is gebed. Die tyd wat ek het vir vertroostende gesprekke met my Vader, is werklik onbeperk. Ek het nog nooit so baie hartgrondige gebede in my lewe gedoen soos hier nie! Ek kan nou verstaan hoe Jesus die hele nag lank tot sy Vader kon bid. Hierdie situasie het my geleer om ten volle op God te vertrou, en dit is miskien die grootste voordeel van my tyd hier.

Sergei Kosjanenko

Gebore: 1961 (Jelan, Wolgograd-streek)

Agtergrond: Werk as ’n liggaamsopvoedingonderwyser

Trou met Olga in 1983. Was aangetrek deur die Bybel se geskiedkundige en profetiese akkuraatheid. Gedoop in 2002

Persoonlike kommentare van Sergei se vrou, Olga b

Wat het jou gehelp om mismoedigheid te verduur?

Ek probeer besig bly met dinge wat my kan help. Ek lees Bybelpublikasies en bid tot Jehovah en vra hom om my te versterk sodat ek enige gevoelens van mismoedigheid kan oorkom. Ek lees Sergei se briewe oor en oor en verbeel my hoe dit sal wees om hom weer te sien. Dit help my ook om na ons Bybelgebaseerde liedjies te luister en saam te sing.

Is daar ’n spesifieke Bybelteks wat jou help om te volhard?

Ek hou veral van wat dit sê in 1 Korintiërs 10:13, waar God belowe dat ‘hy nie sal toelaat dat ons ’n versoeking deurmaak wat ons nie kan hanteer nie’. Ek verstaan dat ek nie al hierdie dinge op my eie kan verduur nie en dat ek seker kan wees dat Jehovah my sal help om te volhard. As dit met ons gebeur, beteken dit dat ons kan aanhou om te volhard. Hierdie dinge sal nie vir altyd aanhou nie.

Dit vertroos ons om te weet dat Jehovah sal aanhou om ’n skuilplek vir sy getroue knegte te wees en dat sy ‘ewige arms onder ons is’. – Deuteronomium 33:27.

Tydlyn

9 November 2021

Kriminele saak word gemaak. Owerhede deursoek 15 huise van Jehovah se Getuies in Achtoebinsk en Znamensk, insluitende die huise van broer Kiramof, Korolef en Kosjanenko
10 November 2021

Sergei Korolef word gearresteer
11 November 2021

Rinat Kiramof en Sergei Kosjanenko word gearresteer. Al drie broers word in aanhouding voor hulle verhoor geplaas
14 November 2022

Kriminele verhoor begin

a b Dit was nie moontlik om persoonlike kommentare te kry by broer Kiramof en Kosjanenko nie.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE