27 DESEMBER 2023 | BYGEWERK: 6 MAART 2024
RUSLAND

JONGSTE NUUS – BROERS TRONK TOE GESTUUR | Broers bly positief ten spyte van verlengde aanhouding en huisarres

SPEEL

Op 5 Maart 2024 het die Oktjabrski-distrikshof van Irkoetsk broer Nikolai Martinof, Sergei Kostejef, Jaroslaf Kalin, Michail Moisj, Igor Popov, Denis Sarazjakof, Aleksei Solnetsjni, Andrei Tolmatjef en Sergei Wasilijef skuldig bevind. Nikolai, Sergei Kostejef, Jaroslaf, Michail, Aleksei en Andrei is elkeen tot sewe jaar tronkstraf gevonnis. Igor en Denis is elkeen tot ses jaar en vier maande tronkstraf gevonnis. Sergei Wasilijef is tot drie jaar tronkstraf gevonnis en is in die hof in hegtenis geneem. Die ander broers is in aanhouding voor hulle verhoor en sal in aanhouding bly.

Profiel

Nikolai Martinof

Gebore: 1958 (Bandarka, Irkoetsk-streek)

Agtergrond: Het as ’n chauffeur gewerk

Trou met Irina in 1982. Hulle het twee kinders

Irina het in 1997 saam met Jehovah se Getuies begin studeer. Die vervulling van Bybelprofesieë het Nikolai oortuig dat dit die waarheid is. Albei is in 1998 gedoop

Persoonlike kommentare van Nikolai se vrou, Irina a

Wat help jou man om ’n positiewe gesindheid te hê al is hy meer as twee jaar in aanhouding voor sy verhoor?

Nikolai het by ’n goeie roetine van Bybellees en bepeinsing gebly, en hy praat dikwels oor hoe Jehovah sy gebede beantwoord. Maar dit is baie moeilik omdat hy weg van ons af is. Nikolai is ’n wonderlike gesinshoof. Dit maak hom mismoedig omdat hy nie vir ons kan sorg soos wat hy in die verlede gedoen het nie. Maar wanneer ons hom vertel hoe Jehovah deur middel van ons broers en susters vir ons sorg, stel dit hom baie gerus. Hy sê ook dat dit hom help om hom voor te stel hoe dit sal wees om saam met sy gesin in die nuwe wêreld te wees. Hy het alreeds in sy gedagtes beplan hoe hy ons toekomstige huis gaan bou en watter soort vrugtebome hy wil plant.

Jaroslaf Kalin

Gebore: 1969 (Piwowaricha, Irkoetsk-streek)

Agtergrond: Het grootgeword in ’n gesin wat Jehovah se Getuies is. Sy ouers en sy oupa en ouma is in 1951 na Siberië verban

Het televisie- en radiotoerusting herstel

Gedoop as een van Jehovah se Getuies in 1987

Trou met Tatjana in 1991. Hulle het twee seuns en twee dogters. Hulle jongste seun is in 2007 oorlede

Persoonlike kommentare van Jaroslaf se vrou, Tatjana b

Watter uitdagings het jou man in aanhouding voor sy verhoor, en wat help hom om te volhard?

Jaroslaf is al meer as twee jaar alleen in ’n tronksel, wat baie moeilik vir hom is. Hy is ’n baie sosiale mens. Om alleen te wees het emosioneel en fisies baie druk op hom geplaas. Maar hy gee nie op of voel nie jammer vir homself nie. In sy briewe haal hy dikwels uit Kolossense 1:11 aan, wat sê: “Ons bid ook dat God julle met sy glorieryke mag versterk sodat julle ten volle kan volhard met geduld en vreugde.” Hy is vasbeslote om lojaal te bly en op Jehovah te vertrou. Ek weet Jaroslaf sien hoe waardevol en nodig dit is om aan te hou om Jehovah se wil nou en vir ewig te doen.

Michail Moisj

Gebore: 1987 (Oekraïne)

Agtergrond: Het in konstruksie en verkope gewerk

Trou met Jelena in 2009. Hulle het twee seuns

Jelena is in 2010 gedoop. Michail het vergaderinge saam met haar begin bywoon. Hy is in 2016 gedoop

Persoonlike kommentare van Michail se vrou, Jelena c

Hoe het Michail aangehou om geestelik vir jou en julle seuns te sorg al is hy meer as twee jaar in aanhouding voor sy verhoor?

Ons oudste seun is 12 jaar oud. Ons jongste is nou twee en ’n half jaar oud en was maar net ses maande oud toe Michail gearresteer is en na die detensiesentrum voor sy verhoor geneem is. Hy verstaan veral nie hoekom sy pa nie by die huis is nie. Al twee kinders mis hom vreeslik baie. Maar Michail skryf gereeld vir hulle – hy stuur gedigte, leer hulle oor diere en voëls, maak blokkiesraaisels vir hulle en gee selfs vir hulle klein navorsingsprojekte. Hy help my ook wanneer ek met negatiewe gedagtes sukkel. Daar was ’n tyd toe ek gevra het: ‘Hoekom ons? Hoekom het dit met ons gesin gebeur?’ In een van sy briewe het Michail my verseker dat my vrae nie noodwendig ’n teken van geestelike swakheid is nie. Hy het geskryf: “Wat die meeste saak maak, is wat ons met hierdie gevoelens doen. As ons, soos Job, toelaat dat Jehovah ons denke regstel, sal hy ons help om ons geestelike balans weer terug te kry en om die regte perspektief te behou.” Daardie brief het my regtig versterk.

Igor Popov

Gebore: 1987 (Kazakstan)

Agtergrond: Een van agt kinders. Sy pa is oorlede toe Igor 11 jaar oud was

Het binnenshuise afwerking gedoen en as ’n loodgieter gewerk

Nadat Igor se pa oorlede is, het sy ma en ouer broer die Bybel begin studeer. Igor het by hulle aangesluit en het dit veral waardeer om oor die opstanding te leer. Igor is in 2006 saam met sewe ander familielede gedoop

Trou met Mangira in 2013

Persoonlike kommentare van Igor se vrou, Mangira d

Watter Bybelvers het jou en jou man gehelp om hierdie moeilike omstandighede te hanteer?

Igor was ’n lang tyd alleen in ’n tronksel opgesluit. In een van sy briewe het hy Psalm 118:5 genoem, waar dit sê: “Ek het Jah in moeilike omstandighede aangeroep. Jah het my geantwoord en my na ’n plek van veiligheid gebring.” Igor het geskryf: “Daardie plek van veiligheid kan ook vertaal word as ‘’n ruim plek’. Wanneer ons deur negatiewe gevoelens vasgevang voel, kan Jehovah ons gebede beantwoord en ons figuurlik vrylaat, wat ons innerlike vrede gee.” Regdeur hierdie hele ondervinding word ons die heeltyd daaraan herinner dat Jehovah altyd ’n manier sal kry om ons te ondersteun en ons nooit sal verlaat nie, maak nie saak waar ons is nie.

Denis Sarazjakof

Gebore: 1988 (Sajanogorsk, Republiek van Chakassië)

Agtergrond: Het in die advertensiebedryf gewerk

Het as een van Jehovah se Getuies grootgeword. Ouers het hom gehelp om waardering vir geestelike dinge te hê. Is oortuig van die voordele om volgens Bybelbeginsels te lewe. Gedoop in 2004

Trou met Olesija in 2007

Persoonlike kommentare van Denis se vrou, Olesija e

Hoe kon Denis jou aanmoedig?

Ek en Denis kommunikeer meestal deur middel van briewe. Ons mag een keer per week omtrent vyf minute oor die foon praat. Ek word ook toegelaat om hom in persoon een uur lank twee keer per maand te besoek. Ons gebruik telefone om met mekaar te praat met ’n glasmuur tussen ons. Elke keer wanneer ons praat, deel Denis ’n geestelike gedagte met my. En hy herinner my dat ons nie onsself as ongelukkige slagoffers moet beskou nie. Ons het goeie rede om gelukkig te wees oor wat ons bereik. Hierdie moeilike situasie het ons nie gebreek nie. Dit het ons eintlik sterker gemaak.

Aleksei Solnetsjni

Gebore: 1976 (Abakan, Krasnojarsk-gebied)

Agtergrond: Het as ’n elektrisiën gewerk

Aleksei se ma en jonger suster het begin om die Bybel saam met Jehovah se Getuies te studeer terwyl hy in die weermag gedien het. Nadat hy by die huis teruggekom het, het hy in die Bybel belanggestel en dit begin studeer. Gedoop in 2004

Trou met Aljona in 2011

Persoonlike kommentare van Aleksei se vrou, Aljona f

Wat help jou man om ’n positiewe gesindheid te hê terwyl hy in aanhouding is?

Aleksei bid aanhoudend dat hy moet onthou dat Jehovah trots is op hom. Hy probeer ook onthou dat die polisiemanne en die hofbeamptes net hulle werk doen. Eerder as om op homself en die moeilike situasie te fokus, het dit hom gehelp om meer te fokus op die voorreg wat hy het om Jehovah se naam te verdedig. Alhoewel Aleksei vir my, sy familie en sy vriende mis, bly hy positief en behou hy selfs sy goeie sin vir humor.

Alhoewel hulle tydelik van hulle families geskei is, is ons oortuig dat niks ons dierbare broers kan skei van God se liefde nie terwyl hulle getrou volhard. – Romeine 8:35-39.

Tydlyn

4 Oktober 2021

Huise van Jehovah se Getuies word in die Irkoetsk-streek deursoek. Kriminele saak word teen Nikolai, Sergei Kostejef, Jaroslaf, Michail, Aleksei, Andrei en Sergei Wasilijef gemaak. Al sewe broers word in aanhouding geplaas
5 Oktober 2021

Jaroslaf, Michail en Aleksei word na ’n detensiesentrum voor hulle verhoor oorgeplaas
6 Oktober 2021

Sergei Kostejef, Nikolai en Andrei word na ’n detensiesentrum voor hulle verhoor oorgeplaas. Sergei Wasilijef word uit tydelike aanhouding vrygelaat en onder huisarres geplaas
30 November 2021

Meer huise word deursoek. Denis en Igor word gearresteer en na Irkoetsk geneem, meer as 1 500 kilometer daarvandaan
1 Desember 2021

Igor word in ’n detensiesentrum voor sy verhoor geplaas
2 Desember 2021

Denis word in ’n detensiesentrum voor sy verhoor geplaas
29 Desember 2022

Kriminele verhoor begin

a b c d e f Omdat broer Martinof, Kalin, Moisj, Popov, Sarazjakof en Solnetsjni in aanhouding voor hulle verhoor was, was dit nie moontlik om onderhoude met hulle te voer nie.

Sien ook

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE