10 FEBRUARIE 2023 | BYGEWERK: 14 JULIE 2023
RUSLAND

JONGSTE NUUS – BROERS TRONK TOE GESTUUR | Drie broers word verhoor in Moskou-hof

SPEEL

Op 12 Julie 2023 het die Sawelofski-distrikshof van Moskou broer Roman Marejef, Anatoli Maroenof en Sergei Tolokonnikof skuldig bevind. Roman is tot ’n tronkstraf van vier jaar en ses maande gevonnis, Anatoli tot ’n tronkstraf van ses jaar en ses maande en Sergei tot ’n tronkstraf van vyf jaar. Anatoli is dadelik in die hof in hegtenis geneem. Roman en Sergei was klaar in aanhouding.

Profiel

Roman Marejef

Gebore:1978 (Moskou)

Agtergrond: Het vir die Moskou-vervoerstelsel gewerk. Was die hoofversorger vir sy gestremde ouers voordat hy na die detensie sentrum gestuur is

Het die Bybel begin lees en was gefassineerd deur die akkuraatheid van Daniël se profesieë. Is in 2002 as een van Jehovah se Getuies gedoop

Persoonlike kommentare

Wat het jou gehelp om positief te bly gedurende hierdie lang tyd van aanhouding?

Om in aanhouding te wees voor my verhoor as gevolg van my geloof in God, het my help besef dat die beste manier hoe ek hom kan loof, deur my gedrag is. Die ander wat saam met my in aanhouding is, het die geleentheid om my maande lank dop te hou om te sien hoe ek ander behandel. Daarom is dit vir my belangrik om Jehovah elke dag vir sy heilige gees te vra sodat ek sy eienskappe kan weerspieël.

Ek het geleer dat dit dikwels meer van ’n uitdaging is om bekommerd te wees oor die hofsaak as om regtig daardeur te gaan. Ons vertrou eers op God, en dan vat hy ons by die hand en lei hy ons deur die “vallei van diep skaduwee” (Psalm 23:4). Die enigste ding wat ek moet doen, is om nie sy hand te los nie. Jehovah vind altyd ’n manier om my hoop te versterk, en daarom het ek nie my vrede en vreugde verloor nie.

Anatoli Maroenof

Gebore: 1953 (Izmail, Oekraïne)

Agtergrond: Het as ’n grafiese ontwerper by ’n koerant gewerk voordat hy afgetree het

Het in 1975 met Aleftina getrou. Hulle het twee seuns

Aleftina het die Bybel begin studeer en is in 1994 gedoop. Anatoli, wat in die koerantbedryf gewerk het, was aanvanklik beïndruk deur die drukgehalte van die publikasies van Jehovah se Getuies. Hy het in Bybelprofesieë begin belangstel en is in 1999 gedoop

Persoonlike kommentare

Hoe het jy vir vervolging voorberei?

Ek en my vrou het geweet dat ons een dag vervolg kon word. So ons het intens aandag geskenk aan elke dagteks, elke artikel en alles wat by die gemeentelike vergaderinge gesê is, insluitende die aankondigings. Ons probeer om die riglyne tot die letter toe te volg.

Wat motiveer jou om te volhard?

Waardering vir wat ons dierbare hemelse Vader alreeds vir my en my gesin gedoen het, motiveer my om nooit op te gee nie. En ek is veral dankbaar vir die toekoms wat hy vir almal belowe wat gehoorsaam aan hom is. Ons weet dat die einde naby is. Dit is ondenkbaar om nou op te gee, veral as ek dink aan al die ondersteuning wat ek kry.

Sergei Tolokonnikof

Gebore: 1972 (Moskou)

Agtergrond: Het in sekuriteit gewerk

Het in 2004 met Marija getrou. Sy het in 2003 die Bybel begin studeer. Sergei was bly dat sy vrae uit die Bybel beantwoord is en het gou ook begin studeer. Albei is in 2005 gedoop

Persoonlike kommentare van Sergei se vrou, suster Marija Pankowa a

Hoe kommunikeer jy met jou man?

Ons kommunikeer hoofsaaklik deur briewe. Sy briewe sluit verskillende Bybelverse en -verslae in. En hy stuur kaartjies en tekeninge wat my laat glimlag. Onlangs het ek toestemming gekry om hom twee keer ’n maand vir 90 minute op ’n slag te besoek. Dit kan tot drie ure vat om na die detensie sentrum te gaan en weer drie ure om terug te kom, so een besoek vat die hele dag.

Wat het jy uit hierdie ondervinding geleer?

Ek sowel as Sergei het baie duidelik gesien dat niemand – of dit nou aanklaers, regters of speurders is – enige iets meer kan doen as wat Jehovah hulle toelaat nie. Hy het absoluut alles onder beheer.

Ons is dankbaar vir die lewende voorbeelde van geloof wat Roman, Anatoli en Sergei stel. En ons is oortuig dat maak nie saak watter moeilike omstandighede ons het nie, ons “nie bang vir enige gevaar [is] nie”, want ons weet dat Jehovah met ons is. – Psalm 23:4.

Tydlyn

20 Oktober 2021

Die owerhede het agt huise van Jehovah se Getuies regoor Moskou deursoek. ’n Kriminele saak is teen Roman, Anatoli en Sergei gemaak. Hulle is daarvan aangekla dat hulle die bedrywighede van ’n ekstremistiese organisasie reël en ander oortuig om aan hierdie bedrywighede deel te neem. Al drie broers is in tydelike aanhouding geplaas
22 Oktober 2021

Roman en Sergei word in aanhouding voor hulle verhoor geplaas. Anatoli is onder huisarres geplaas
17 Junie 2022

Die kriminele verhoor het begin

a Gedurende die voorbereiding van hierdie artikel was broer Tolokonnikof in aanhouding voor sy verhoor, en dit was nie moontlik om sy persoonlike kommentare te kry nie. Suster Pankowa het haar nooiensvan behou nadat hulle getroud is.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE