14 SEPTEMBER 2023 | BYGEWERK: 22 SEPTEMBER 2023
RUSLAND

JONGSTE NUUS – SUSTERS SKULDIG BEVIND | Drie susters word deur gebed versterk

SPEEL

Op 21 September 2023 het die Zeja-distrikshof van die Amoer-streek suster Margarita Moisejenko, Galina Jatsik en Jelena Jatsik skuldig bevind. Suster Margarita het ’n opgeskorte tronkvonnis van drie jaar gekry, suster Galina ’n opgeskorte tronkvonnis van twee jaar en suster Jelena ’n opgeskorte tronkvonnis van twee en ’n half jaar. Hulle hoef nie op hierdie stadium tronk toe te gaan nie.

Profiel

Margarita Moisejenko

Gebore: 1978 (Krasnojarsk, Krasnojarsk-gebied)

Agtergrond: Werk as ’n naaldwerkster. Trou met Konstantin in 1998. Op 14 Julie 2021 is Konstantin skuldig bevind en ’n opgeskorte tronkvonnis van ses jaar gegee

Het die Bybel begin studeer toe sy 18 was nadat ’n nabye familielid gesterf het. Gedoop as een van Jehovah se Getuies in 2001

Persoonlike kommentare

Wat help jou om te volhard?

Ek onthou dat Spreuke 21:31 by die “Wees moedig”!-streekbyeenkoms vir 2018 bespreek is. Die vers sê: “Die perd word vir die dag van oorlog gereedgemaak, maar redding behoort aan Jehovah.” Perde kan van nature senuweeagtig wees. Om te keer dat hulle gedurende ’n oorlog bang word, moet hulle “gereedgemaak” of opgelei word. Dieselfde geld vir ons. Ons word nie met geloof en moed gebore nie. Ons moet onsself gereedmaak vir ons eie oorloë, of moeilike situasies, deur hierdie eienskappe te ontwikkel. Om dit te kan doen, het ek besef hoe belangrik dit is om my vriendskap met Jehovah te versterk, om ’n diep studie van die Bybel te maak en om te bid dat my geloof sterk sal bly, maak nie saak wat gebeur nie.

Galina Jatsik a

Gebore: 1950 (Zeja)

Agtergrond: Het gewerk as ’n koste-ontleder vir die stad se konstruksie- en instandhoudingsdepartement. Is nou afgetree

Trou met Waleri in 1971. Hulle het een dogter en een seun. Haar man is in 1995 oorlede

Het as ’n ateïs grootgeword, maar het altyd gewonder oor die oorsprong van die lewe. Het begin om die tydskrifte Die Wagtoring en Ontwaak! te lees en om vergaderinge by te woon. Het oortuigende bewyse gekry dat daar ’n Skepper is. Gedoop in 1994

Persoonlike kommentare

Wat het jy geleer oor die krag van gebed gedurende hierdie moeilike tyd?

Ek het geleer hoe belangrik dit is om ’n kort gebed te sê in onverwagse situasies. Dit help my om my emosies te beheer en om op die regte manier te reageer. Dit is ook wonderlik om te weet dat ander vir my bid. Jakobus 5:16 sê: “Die smeekgebede van ’n regverdige man het ’n kragtige uitwerking.” Ek besef dat my broers en susters se gebede deel is van die rede waarom ek innerlike vrede het en nie vreesbevange is nie. Gebede, my eie asook dié van ander, is soos ’n reddingsbootjie wat my help om nie te sink nie.

Jelena Jatsik b

Gebore: 1972 (Zeja)

Agtergrond: Werk as ’n kleremaakster

Trou met Andrei in 1994. Hulle het een dogter

Jelena se ma en haar jonger broer, Jefgeni Bitoesof, het eerste die Bybel met Jehovah se Getuies begin studeer. Jelena het die praktiese waarde van Bybelbeginsels gesien en hoe dit haar lewe verbeter het deur dit toe te pas. Gedoop in 1997

Persoonlike kommentare

Watter uitwerking het dit op jou gehad om deur hierdie vervolging te gaan?

My verhouding met God het sterker geword. Ek bid tot Jehovah vir kalmte, en ek sien hoe hy my gebede beantwoord deur my innerlike vrede te gee. My waardering vir my broers en susters het ook groter geword. Dit is vertroostend om te weet dat hulle gereed is om my te help. Ek voel regtig dat ek deel is van ’n groot familie. En ek is ook meer bewus dat dit nodig is om vir diegene te bid, wat soos my broer Jefgeni, in die tronk is. Ek bid elke dag vir hulle.

Die ondervindinge van ons susters herinner ons daaraan dat Jehovah ons gebede hoor en ons sal help om die eienskappe wat ons nodig het, te ontwikkel sodat ons enige moeilike tye kan oorkom. – 1 Johannes 5:14.

Tydlyn

21 Maart 2019

Die Moisejenko-gesin se huis word deursoek
13 Oktober 2020

Jelena en Galina se huise word deursoek
22 November 2021

Kriminele saak word gemaak
15 Februarie 2022

Word onder reisbeperkings geplaas
24 April 2023

Kriminele verhoor begin

a b Suster Galina Jatsik en Jelena Jatsik is nie familie van mekaar nie.

Sien ook

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE