26 AUGUSTUS 2022 | BYGEWERK: 8 MAART 2023
RUSLAND

JONGSTE NUUS – VONNIS VERANDER | Kalm en vol vertroue tydens vervolging

SPEEL

Op 1 Maart 2023 het die hof van die Stawropol-gebied sy uitspraak gegee in die saak teen broer Anatoli Gezik en sy vrou, Irina, en broer Wiktor Zimofski. Die vonnisse wat Anatoli en Wiktor eers gekry het, is verander na opgeskorte tronkvonnisse. Anatoli hoef nie meer korrektiewe arbeid te doen nie. Wiktor is onmiddellik uit die tronk vrygelaat. Irina se opgeskorte tronkvonnis bly dieselfde. Sy hoef nie op hierdie stadium tronk toe te gaan nie.

Op 14 November 2022 het die Georgiefski-stadshof van die Stawropol-gebied Anatoli en sy vrou, Irina, en Wiktor skuldig bevind. Anatoli het ’n vonnis van vier jaar en twee maande korrektiewe arbeid gekry. Irina het ’n opgeskorte tronkvonnis van vier jaar en twee maande gekry. Wiktor is tot ses jaar en twee maande tronkstraf gevonnis en is onmiddellik in hegtenis geneem.

Tydlyn

23 Oktober 2019

Die huise van drie gesinne wat Getuies van Jehovah is, word deur polisiemanne in Georgiefsk deursoek. Polisiemanne het valse bewysstukke in die huise geplant terwyl hulle dit deursoek het. Anatoli, Irina, Wiktor en agt ander Getuies is regdeur die nag aangehou en ondervra
30 Desember 2019

’n Kriminele saak word teen Anatoli, Irina en Wiktor gemaak
23 Januarie 2020

Wiktor word in tydelike aanhouding geplaas vir verdere ondervraging. Hy word die volgende dag na aanhouding voor sy verhoor oorgeplaas
23 Maart 2020

Wiktor word uit aanhouding voor sy verhoor vrygelaat en onder huisarres geplaas
6 Mei 2020

Wiktor word uit huisarres vrygelaat en onder reisbeperkings geplaas
6 Oktober 2021

Wiktor se reisbeperkings word verwyder
10 Maart 2022

Die kriminele verhoor begin

Profiel

Anatoli Gezik

Gebore: 1967 (Nezlobnaja, Stawropol-gebied)

Agtergrond: Terwyl hy in ’n gevangenis vir jongmense gewerk het, het hy gewonder oor die toekoms van die jongmense wat daar was en die doel van die lewe. Het antwoorde op sy vrae gevind terwyl hy die Bybel saam met Jehovah se Getuies gestudeer het. Trou met Irina in 1997. Gedoop in 1998

Persoonlike kommentare

Wat het jou gedurende hierdie moeilike tye versterk?

Omdat ek baie dink aan die nuwe wêreld wat voorlê, besef ek dat die lewe ’n doel het en nie nutteloos is nie. Almal van ons sal binnekort deur moeilike tye gaan, en die probleme sal van persoon tot persoon verskil. Om hierdie dinge te oorkom moet ons na aan Jehovah en sy Seun bly, en altyd al die dinge onthou wat hulle alreeds vir ons gedoen het. Gedurende al hierdie moeilike tye voel dit asof Jehovah my hand vasgehou het en my help wanneer ek dit nodig het.

Wiktor Zimofski

Gebore: 1969 (Georgiefsk)

Agtergrond: Albei sy ouers is oorlede toe hy 13 jaar oud was

Het die Bybel begin studeer toe sy swaer hom aan Jehovah se Getuies voorgestel het. Die opstandingshoop het hom baie vertroos. Gedoop in 2003

Trou met Nadezjda in 2006. Hulle het drie kinders. Toe Wiktor gearresteer is, was Nadezjda swanger met hulle derde kind

Persoonlike kommentare

Hoe het jy Jehovah se ondersteuning gevoel toe jy onder huisarres was?

Terwyl ek onder huisarres was, is ek nie toegelaat om die telefoon of die internet te gebruik nie en mag ek nie die huis verlaat het nie. . . . Dit het beteken dat ek nie vir my gesin kon sorg nie. My vrou was nege maande swanger, en ek kon nie eers na die winkel toe gaan om kruideniersware te koop of om goed te koop wat ons vir die baba sou nodig kry nie. Dit het ons baie ontstel, maar ons familie en medegelowiges het ons gehelp. Jehovah het ons broers en susters gebruik om ons met alles te help: kos, klere en selfs ons emosionele behoeftes.

Terwyl hulle met vreugde en hoop volhard, is ons oortuig dat Jehovah altyd “naby almal wat hom aanroep”, sal wees. – Psalm 145:18.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE