In Suid-Afrika het dié wat die dowes ondersteun, Jehovah se Getuies bedank omdat hulle dowe mense help om hulle lewe te verbeter deur vir hulle video’s van ’n hoë gehalte in Suid-Afrikaanse Gebaretaal (SASL) te voorsien. Dit het gebeur nadat die boek Galasiërs en Efesiërs van die Nuwe Wêreld-vertaling van die Christelike Griekse Geskrifte in SASL op 15 November 2021 vrygestel is. Dit beteken dat daar nou al tien Bybelboeke in SASL beskikbaar is. Nog vier Bybelboeke sal heel moontlik teen April 2022 vrygestel word. Al hierdie boeke kan gevind word op jw.org en in die JW Library Sign Language-app.

Minna Steyn, ’n spesialis in onderwys en die adjunkhoof van die Wes-Kaapse regering, het oor die Getuies gesê: “Dis vir my baie lekker om na die tolke te kyk, en ek moet hulle en die organisasie gelukwens oor die standaard en gehalte van die gebaretaal.”

Bongani Makama, president van die Federasie vir Mense met Gestremdhede in Eswatini, het gesê: “Ons prys Jehovah se Getuies omdat hulle die weg baan vir die insluiting van dowes en hardhorendes.” Hy het verder gesê: “[Die dowes] verdien ’n Bybel in hulle taal. Dit is hoekom ons Jehovah se Getuies prys omdat hulle hierdie Bybelboeke aan die dowe gemeenskap in die taal van hulle hart voorsien. Ons kan nie wag om al 66 Bybelboeke in gebaretaal te hê nie.”

Omtrent 450 000 mense in Suid-Afrika gebruik SASL. Daar is 283 dowe of hardhorende verkondigers in Suid-Afrika. As gevolg van wat Jehovah se Getuies doen, kry “alle soorte mense” akkurate kennis van die waarheid, en dit sluit dowe mense in Suid-Afrika in wat in die takkantoor se gebied bly. – 1 Timoteus 2:4.