Op 7 Maart 2021 het verkondigers in Suid-Afrika wat Kwangali, Sepulana en Tswana praat ’n spesiale geskenk gekry. In ’n toespraak wat vooraf opgeneem is, het broer Mark Sanderson van die Bestuursliggaam die Nuwe Wêreld-vertaling van die Christelike Griekse Geskrifte in Kwangali en Sepulana en die hersiene Nuwe Wêreld-vertaling in Tswana vrygestel. Verkondigers het deur middel van ’n videokonferensie na die spesiale program gekyk en die Bybels is in digitale formaat beskikbaar gestel.

Die span van drie vertalers het die vertaling in twee jaar voltooi. Die meer as 240 verkondigers wat hierdie taal praat, het nou ’n vertaling wat maklik is om te lees en wat hulle sal help met hulle persoonlike studie en velddiens.

Daar het ses vertalers aan hierdie projek gewerk, en dit het omtrent een en ’n half jaar geneem om dit te voltooi. Daar is 374 verkondigers in Suid-Afrika wat Sepulana praat.

Een vertaler het gesê: “Wanneer ons velddiens gedoen het, het ons dikwels ’n Sepedi-vertaling gebruik. Maar voordat ons ’n vers aan ’n belangstellende kon verduidelik, moes ons eers een of twee woorde uit die vers verduidelik of vertaal. Nou, met hierdie vertaling, hoef jy dit net eenkeer te lees en mense verstaan dit dadelik.”

Dit het omtrent vier jaar geneem om hierdie hersiene vertaling te voltooi. Altesaam ses vertalers het aan die projek gewerk. Daar is meer as 5 600 verkondigers in die Tswana-veld.

Een vertaler het oor die Nuwe Wêreld-vertaling in Tswana gesê: “Dit sal verkondigers help om daarop te fokus om hulle vaardighede in die bediening te verbeter, in plaas daarvan om moeilike woorde te moet verduidelik. Dit sal ook ’n goeie studiehulp wees. Die tabelle, kaarte, prente en woordelys sal verkondigers help om Bybelverslae te visualiseer.”

Hierdie Bybelvrystellings sal ons broers en susters en dié vir wie hulle preek, help om in hulle geestelike behoefte te voorsien. Ons is regtig dankbaar vir al die geestelike voedsel wat ons vandag het. – Jesaja 65:13.