Op 23 April 2023 is Die Bybel – Die boek Matteus in Chinese Gebaretaal (CSL) vrygestel gedurende ’n program wat in Suid-Korea gehou is. Dit is die eerste keer dat ’n boek van die Bybel al ooit in CSL vrygestel is. Byna 200 persone van die twee CSL-gemeentes in Suid-Korea was teenwoordig. Die gebaretaal-vertaling is nou beskikbaar op jw.org en in die JW Library Sign Language-app.

Die vertaalspan het hard gewerk om die Bybelboek in natuurlike en eenvoudige taal te vertaal. In verband hiermee het een vertaler gesê: “Twee uit die drie lede op die vertaalspan is doof, so ons het dikwels gepraat oor hoe dowe persone dink. Dit was makliker om te vertaal omdat ons dit vanuit die oogpunt van dowe persone kon doen.”

’n Ander vertaler het gesê: “Om aan hierdie vertaling te werk, het my gehelp om duidelik te verstaan wat Jesus gedoen het, waardeur hy gegaan het en wat hy ander geleer het terwyl hy op aarde was.”

’n Dowe verkondiger wat die program bygewoon het, het gesê: “Voor hierdie vrystelling was daar net ’n paar tekste in CSL beskikbaar. Dit was asof ons net ’n baie klein deel van ’n prent kon sien. Noudat die boek Matteus vrygestel is, is ek baie opgewonde om die groter prentjie te sien.”

Nog ’n dowe verkondiger het gesê: “Die gebaretaalpublikasies wat deur Jehovah se organisasie voorsien word en die vrystelling van die boek Matteus in CSL, het my laat besef hoe graag Jehovah die dowes wil help en hoe baie hy hulle liefhet.”

Ons sê vir Jehovah dankie vir hierdie vertaling, wat ons broers en susters gaan help om aan te hou om God met “gees en waarheid” te dien. – Johannes 4:24.