Sedert die openbare verhoor van Suid-Korea se konstitusionele hof in Julie 2015 stem al hoe meer mense saam dat dinge moet verander. En selfs al is daar nog nie ’n hofbeslissing of nuwe wetgewing in verband met gewetensbeswaar teen militêre diens nie, is die algemene beskouing hieroor in Suid-Korea besig om te verbeter. Die mening van die laer howe, die publiek, die regsgemeenskap en die nasionale en internasionale menseregtegemeenskappe is ten gunste van ’n oplossing wat nie mense straf omdat hulle hulle gewetensvryheid uitoefen nie.

Gedurende die week van 7 Augustus 2017 is sewe jong mans wat in die hof was as gevolg van gewetensbeswaar teen militêre diens, onskuldig bevind. Dit het nog nooit voorheen gebeur nie. In die regsgeskiedenis van die Republiek van Korea het die howe al meer as 19 000 gewetensbeswaardes skuldig bevind. Daar is nog net 42 gewetensbeswaardes onskuldig bevind. Van hierdie 42 beslissings is 38 sedert Mei 2015 gelewer, met 25 hiervan in 2017.

Party howe het die hofsake uitgestel terwyl hulle wag vir ’n beslissing deur die konstitusionele hof. Dit het veroorsaak dat die aantal sake wat nie afgehandel word nie, al hoe meer raak. Volgens mnr. Doe-djin Oh, ’n regsgeleerde wat al baie gewetensbeswaardes verteenwoordig het, is daar in vergelyking met ’n paar jaar gelede, nou meer as vyf keer soveel onafgehandelde sake.

Baie mense kom agter dat die mening van die howe in Suid-Korea besig is om te verander. Gewetensvryheid word deur die grondwet van Suid-Korea gewaarborg. Daarom het baie howe wat gewetensbeswaardes onskuldig bevind het, gesê dat hierdie persone se gewetensvryheid geskend word wanneer hulle gestraf word omdat daar nie ’n program vir alternatiewe burgerlike diens is nie. Ander het tot die slotsom gekom dat gewetensbeswaar teen militêre diens ’n “geldige rede” is om te weier om vir militêre diens opgeroep te word, iets waarvoor daar voorsiening gemaak word in die Dienspligwet.

Hoewel die erkenning en beskerming van menseregte nie deur die publiek se mening bepaal word nie, gebruik die Departement van Verdediging die publiek se mening om hulle optrede te regverdig om nie hierdie kwessie op te los nie. Maar die publiek se mening is besig om te verander. In ’n meningspeiling in 2005 het net 10 persent van die mense saamgestem dat die reg op gewetensbeswaar erken moet word. Maar in ’n opname in Mei 2016 was 70 persent van die mense met wie ’n onderhoud gevoer is, ten gunste daarvan dat alternatiewe diens ingestel moet word. ’n Opname in Julie 2016 onder regsgeleerdes in Seoel het gewys dat 80 persent ten gunste daarvan is.

Die Nasionale Menseregtekommissie van Korea (NHRC) het gesien dat die verandering in beskouings in Suid-Korea veroorsaak dat wetgewers die wet wil verander. Wetgewers het voorgestel dat alternatiewe diens in drie verskillende wysigings van die wet deur die Nasionale Vergadering aanvaar word by sy sessie in Junie 2017. Die NHRC het ook die internasionale gemeenskap se menings en beslissings om hierdie wysigings te aanvaar, in ag geneem. Hulle het toe ondersoek of die voorstelle ooreenkom met internasionale standaarde vir alternatiewe burgerlike diens en of dit aanvaarbaar is vir Jehovah se Getuies en ander. Die NHRC het hulle bevindings aan die regering van Suid-Korea voorgelê.

Toe Jae-in Moon, ’n regsgeleerde met baie ondervinding op die gebied van menseregte, op 10 Mei 2017 met sy termyn as president begin het, het hy belowe: “Gewetensvryheid is een van die belangrikste menseregte in die Grondwet. En daarom belowe ek om alternatiewe diens in te stel en ontslae te raak van die gebruik om gewetensbeswaardes tronk toe te stuur.”

Op 11 Augustus 2017 het verteenwoordigers van 904 gewetensbeswaardes ’n petisie vir die nuwe president gegee. In hierdie petisie word gevra dat die regering die reg op gewetensbeswaar erken deur diegene wat reeds in die tronk is, vry te laat en ’n program van alternatiewe burgerlike diens in te stel. Die petisie is onderteken deur 360 gewetensbeswaardes wat op die oomblik in die tronk is en 544 gewetensbeswaardes wie se hofsake nog aan die gang is.

Hjoen-soo Kim, wat die petisie onderteken het, het verduidelik wat dit vir hom beteken: “Ek sien daarna uit dat burgerlike diens ingestel word wat met internasionale standaarde ooreenkom en wat niks te doen het met die weermag nie. Ek sal met graagte gemeenskapsdiens, noodlenigings-werk of enige ander werk doen wat ek gegee word. Ek sal daarvan hou om iets te doen wat die gemeenskap sal help.”

Jehovah se Getuies en ander is bly om te sien dat menings besig is om te verander. Dit kan veroorsaak dat ’n beleid aangepas word wat daartoe gelei het dat duisende mans oor die afgelope 70 jaar gestraf is. Die Getuies is dankbaar dat president Moon, lede van die Nasionale Vergadering en howe in Suid-Korea regtig daarin belangstel om mense wat gewetensbeswaar teen militêre diens aanteken, te respekteer en regverdig te behandel.