Op 9 Oktober 2022 het broer Paul Norton, ’n lid van die Takkomitee in Brittanje, Die Bybel – Die goeie nuus volgens Matteus in Pandjabi (Shahmukhi) gedurende ’n program wat in persoon gehou is, vrygestel. Meer as 1 300 mense het dit bygewoon, wat verkondigers ingesluit het wat deur middel van videoverbinding vanaf Koninkryksale regoor Brittanje ingeskakel het. Die Bybelboek was dadelik beskikbaar in oudio-, digitale en gedrukte formaat.

Pandjabi word deur miljoene mense in Indië en Pakistan sowel as baie mense in ander lande gepraat. In Oktober 2020 is die volledige Nuwe Wêreld-vertaling van die Bybel in Pandjabi wat in die Gurmukhi-alfabet geskryf is, vrygestel. Maar hierdie nuwe uitgawe sal gebruik word deur dié wat Pandjabi in die Shahmukhi-alfabet lees, en wat nie gewoonlik die Gurmukhi-alfabet gebruik of die woordeskat heeltemal verstaan nie. Tot nou toe moes dié wat Pandjabi (Shahmukhi) lees, staatmaak op Bybelvertalings in ander tale, soos Oerdoe.

Oor die jare is ’n paar individuele Bybelboeke in Pandjabi (Shahmukhi) vrygestel. Maar hierdie vertaling van die boek Matteus fokus spesifiek daarop om maklik gelees en verstaan te word. Die belangrikste is dat hierdie vertaling Jehovah se naam bevat.

Een vertaler wat aan die projek gewerk het, het gesê: “Mense het dalk Jehovah se naam in kerkgesange gehoor. Maar omdat vertalers die naam uit die meeste verse in die Bybel uitgehaal het, het mense dikwels gevoel dat hulle nie nader aan God kan kom nie. Nou sal hulle God se naam in hierdie Bybelboek sien op elke plek waar dit moet wees.”

Ons is vol vertroue dat hierdie vrystelling ons broers en susters sal help om aan te hou om nader aan Jehovah te kom en sy naam te loof. – Matteus 6:9.