Daar word verwag dat die konstruksie van die takkantoor in Brittanje naby Chelmsford, Essex, in Desember 2019 klaar sal wees. Kenners erken al klaar dat hierdie bouprojek ’n goeie voorbeeld is van geboue wat die omgewing mooi maak.

Toe ons broers die eiendom in 2015 gekoop het, was dit ’n skrootwerf en ’n vullishoop waar mense ou motors, trokke en enigiets wat hulle wou, kon weggooi. Vrywilligers het baie afval en vullis opgegrawe en herwin, insluitende duisende bande waarvan party uit die Tweede Wêreldoorlog kom. Toe het hulle deur die grond gesif en selfs klein stukkies rommel en vullis verwyder. Hierdie klein stukkies is herwin of weer gebruik vir iets anders as dit moontlik was. Die oorblywende grond is weer vir die bouprojek gebruik. Meer as 11 000 broers en susters het vrywilliglik meer as vier miljoen uur gebruik om die eiendom van 34 hektaar skoon te maak.

Die voltooide eiendom sal inheemse en botaniese tuine, damme, velde met wilde blomme en ’n vrugteboord insluit. Die ontwerp is nie net mooi nie. Dit gee ook ’n plek vir inheemse natuurlewe om te bly, keer dat water gemors word, beskerm ouer en groter bome en geplante heinings, vermeerder die plantlewe en maak die gebied mooi vir die mense wat in die gebied woon.

Broer Paul Rogers, ’n lid van die Bouprojekkomitee (CPC), sê: “Die eiendom wat ons gekoop het, was jare lank misbruik en afgeskeep. Die werk aan die bouterrein het begin toe ’n hele klomp vrywilligers deeglik deur die rommel gesif het. Die skoonmaak-fase is gevolg deur ’n proses waar die land gevorm is om in te pas by die natuurlike kenmerke wat reeds op die stuk land was. Honderde nuwe bome, bosse en ander plante is ook geplant. Die pragtige eindresultaat herinner ons aan die woorde in Esegiël 36:35, 36: ‘En mense sal sê: “Die verwoeste land het soos die tuin van Eden geword” . . . En die nasies . . . sal moet weet dat ek, Jehovah, opgebou het wat afgebreek was, en dat ek bome geplant het in die land wat verwoes was.’”