8 DESEMBER 2022
WÊRELDNUUS

Broer Doebowenko en Litfinjoek tot ses jaar tronkstraf gevonnis

SPEEL

Op 30 November 2022 het die Armjanski-stadshof van die Republiek Krim broer Aleksandr Doebowenko en Aleksandr Litfinjoek skuldig bevind. Al twee broers het ’n tronkstraf van ses jaar ontvang en is onmiddellik in hegtenis geneem.

Profiel

Aleksandr Doebowenko

Gebore: 1973 (Otjakif, Oekraïne)

Agtergrond: Het as ’n sweiser, elektrisiën en houtwerker gewerk. Het in 1999 met Irina getrou

Sy ma het een van Jehovah se Getuies geword en hom van die waarheid vertel. Was bly om van die Bybel se belofte van ’n paradysaarde te leer. Gedoop in 1999

Persoonlike kommentare a

Hoe het jy die uitdaging hanteer om onder huisarres te wees?

Ek is meer as 13 maande lank nie toegelaat om met enige iemand buite my huis behalwe die speurders en regsgeleerdes te kommunikeer nie. Ek mag nog steeds nie met enige van die broers en susters wat getuies in my saak is, praat nie. Maar ek het oor die voorbeeld van Elia nagedink. Hy was in die wildernis en baie angstig. Jehovah het Elia versterk en hom verseker dat hy nie alleen is nie. Jehovah het nie vir Elia verlaat nie, en ek is oortuig dat Hy my ook nie sal verlaat nie.

Aleksandr Litfinjoek

Gebore: 1960 (Amangeldi, Kazakstan)

Agtergrond: Het in ’n chemiese aanleg en as ’n sweiser gewerk. Het in 1979 met Nadezjda getrou. Hulle het een seun

Het gewonder hoekom God swaarkry en goddeloosheid toelaat. Het die antwoord gekry nadat hy en Nadezjda die Bybel saam met Jehovah se Getuies begin studeer het. Gedoop in 1993

Persoonlike kommentare b

Hoe het jy jouself voorberei om vervolging te hanteer?

Toe ek hoor wat besig is om met my broers en susters te gebeur, het ek gewonder of ek gereed is om vervolging te hanteer. Ek het agtergekom dat ek nog nie heeltemal gereed was nie. Ek het Bybelverslae van dié wat moeilike tye verduur het, begin lees en daaroor nagedink. Ek het op hulle volharding en vertroue in Jehovah gefokus. Toe ek navorsing oor hierdie verslae gedoen het, het ek probeer om die verslae werklik vir myself te maak. Ek en my vrou het ook tyd daaraan spandeer om lewensverhale van getroue hedendaagse broers en susters te lees. Hierdie dinge het ons geloof versterk en ons beter voorbereid laat voel vir wat sou kom.

Hoe het die gebede wat ander namens jou gedoen het, jou gehelp?

Dit raak my hart wanneer ek hoor hoe intens die broers en susters vir my bid. Hulle vra Jehovah om my die kalmte, moed en krag wat ek nodig het, te gee. Voor elke verhoor het een broer my gevra watter spesifieke bekommernisse oor die verhoor ek daardie dag in my persoonlike gebede genoem het. Hy het dan vir daardie selfde dinge gebid terwyl hy buite gewag het. Dit het my regtig versterk.

Dit vertroos ons om te weet dat Jehovah altyd by ons is wanneer ons deur moeilike tye gaan. – Psalm 139:7-12.

Tydlyn

2 Augustus 2021

Kriminele saak word gemaak. Albei broers word daarvan aangekla dat hulle videoverbindingsagteware gebruik het om die bedrywighede van ’n ekstremistiese organisasie te bevorder
5 Augustus 2021

Die huise van agt gesinne van Jehovah se Getuies word deursoek, insluitende dié van die Doebowenko- en Litfinjoek-gesin. Broer Litfinjoek word gearresteer en in tydelike aanhouding geplaas
6 Augustus 2021

Broer Litfinjoek word uit tydelike aanhouding vrygelaat en onder huisarres geplaas
9 Augustus 2021

Owerhede deursoek die Doebowenko-gesin se huis vir ’n tweede keer. Aleksandr word ondervra en onder huisarres geplaas
11 Augustus 2021

Broer Litfinjoek word amptelik daarvan aangekla dat hy die bedrywighede van ’n ekstremistiese organisasie reël
8 Februarie 2022

Broer Doebowenko word amptelik daarvan aangekla dat hy die bedrywighede van ’n ekstremistiese organisasie reël
29 April 2022

Kriminele verhoor begin. Die regter weier broer Litfinjoek se versoek om ’n dokter te besoek en behandeling te ontvang terwyl hy onder huisarres is
8 September 2022

Beide broers word toegelaat om daagliks hulle huise tussen 7:00 en 19:00 te verlaat
30 November 2022

Beide broers word tot ses jaar tronkstraf gevonnis

a b Persoonlike kommentare is voorsien voordat hulle gevonnis is.

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE