Op 2 Maart 2024 het broer Hideyuki Motoi, ’n lid van die Takkomitee in Australasië, die Bybelboek Matteus in Australiese Gebaretaal, wat ook as Auslan bekend staan, vrygestel. Die Bybelboek is vrygestel gedurende ’n spesiale program wat by ’n Koninkryksaal in Brisbane, Australië, gehou is. Altesaam 159 broers en susters het die program in persoon bygewoon. En nog 377 mense van Australië, Nieu-Seeland en Samoa het deur middel van videoverbinding by die program ingeskakel. Die vrystelling was dadelik beskikbaar om van jw.org en die JW Library Sign Language-app afgelaai te word.

Omtrent 20 000 mense wat in Australië, Nieu-Seeland, Samoa en Tonga bly, gebruik Australiese Gebaretaal of ’n gebaretaal wat min of meer dieselfde is. Jehovah se Getuies het in 2001 begin om Bybelpublikasies in Australiese Gebaretaal te vertaal. Hulle het met die brosjure Wanneer ’n geliefde sterf begin. In April 2023 is ’n vertaalkantoor in Brisbane begin. Vandag dien amper 350 broers en susters in een gebaretaalgemeente en 18 groepe regoor die takkantoor se gebied.

Dit is die eerste volledige Bybelboek wat al ooit in Australiese Gebaretaal vertaal is. Nadat sy die vertaling gekry het, het een suster gesê: “Die liefde en goedhartigheid van Jesus se woorde in die Bergpredikasie het my diep geraak. Toe ek dit in Australiese Gebaretaal kyk, het dit vir my gevoel asof hy met my persoonlik praat!”

’n Dowe suster in ’n gebaretaalgemeente in Brisbane het gesê: “Om die boek Matteus in Australiese Gebaretaal te hê, sal my help om Jesus se eienskappe beter na te volg en om meer effektief in die predikingswerk te wees. Dankie, Jehovah!”

Ons is bly oor die vrystelling van die Bybelboek Matteus in Australiese Gebaretaal en is oortuig dat dit nog meer mense sal help om die nou poort te vind wat na die lewe lei. – Matteus 7:13, 14.