Op 2 Julie 2023 is Die Bybel – Die goeie nuus volgens Matteus in twee Koerdiese tale by twee verskillende geleenthede vrygestel. In Duitsland is die boek in Koerdiese Koermandsji vrygestel. Dit is ook in Koerdiese Koermandsji (Kaukasus) in Georgië vrygestel. Ongeveer 750 mense het die geleenthede bygewoon.

Broer Dirk Ciupek, ’n lid van die Takkomitee in Sentraal-Europa, het die boek Matteus in Koerdiese Koermandsji vrygestel tydens ’n program wat by die takkantoor in Sentraal-Europa in Selters, Duitsland, gehou is. Diegene wat dit bygewoon het, het gedrukte kopieë ontvang. ’n Digitale weergawe is ook beskikbaar gemaak om afgelaai te word.

Tydens ’n program wat in Tbilisi, Georgië, gehou is, het broer Lewani Kopaliani, ’n lid van die Takkomitee in Georgië, die boek Matteus in Koerdiese Koermandsji (Kaukasus) vrygestel. Broers en susters in Aparan, Armawir en Jerewan, Armenië, het deur middel van videoverbinding ingeskakel. Diegene wat dit bygewoon het, het gedrukte kopieë ontvang. ’n Digitale weergawe is ook beskikbaar gemaak om afgelaai te word.

Koerdiese Koermandsji en Koerdiese Koermandsji (Kaukasus) is soortgelyke tale, maar kan verskil in grammatika en sinskonstruksie. En alhoewel party woorde in albei tale dieselfde gespel word, kan hulle verskillende betekenisse hê. Daarom het albei vertaalspanne goed saamgewerk om die boek Matteus in hulle onderskeie tale te vertaal. Een vertaler het die volgende gesê oor die voordele van hierdie Bybelboek: “Vir die baie Koerdiese mense wat dors na die waarheid, is hierdie nuwe vertaling soos ’n verfrissende glas skoon water.”

Net soos ons broers en susters wat Koerdiese Koermandsji en Koerdiese Koermandsji (Kaukasus) praat, dank en loof ons Jehovah omdat hy dit vir baie meer mense moontlik gemaak het om hom te leer ken! – Matteus 5:3.