Op 20 Mei 2023 het broer Mark Sanderson, ’n lid van die Bestuursliggaam, die toewydingstoespraak gegee vir ’n nuwe Koninkryksaal in Iqaluit, Nunavut, Kanada. Altesaam 44 mense het die toewydingsprogram in persoon bygewoon, en nog 388 mense het deur middel van videoverbinding ingeskakel. Nunavut word beskou as een van die plekke op aarde met die kleinste bevolkings. Daar is minder as 40 000 inwoners, en die landoppervlak is omtrent 1 837 000 vierkante kilometer. Soos voorheen op jw.org berig is, het ons broers baie unieke uitdagings oorkom om hierdie Koninkryksaal te bou. Die moedige Getuies wat eerste na hierdie afgesonderde gebied gekom het om die goeie nuus te verkondig, moes koue weer en rowwe terrein verduur. Die voorbeeld van hierdie vasbeslote en getroue Getuies is in die toewydingsprogram beklemtoon.

In 1976 het suster Margaret Gallie 2 052 kilometer van Montreal, Quebec, getrek na die gebied wat nou as Iqaluit, Nunavut, bekend staan. Sy was die eerste Getuie om in hierdie uitgestrekte en onvrugbare land te preek. Later daardie jaar het broer Hans Pintar, ’n kringopsiener, en sy vrou, Minerva, suster Gallie spesiaal ’n week lank besoek om haar aan te moedig en om deel te neem aan die bediening.

Toe, in 1983, het ’n klein groepie ywerige Getuies na Iqaluit gereis. Hulle het hard gewerk om die waarheid in die gebied bekend te maak, en dit het daartoe gelei dat een van die plaaslike families die eerste inwoners in die gebied geword het, wat gedoop is. Oor die volgende 20 jaar het moedige Koninkryksverkondigers verskeie kere na hierdie afgesonderde gebied gereis om die goeie nuus met ander te deel. In 2008 is ’n groep in Iqaluit begin. Teen 2010 het hierdie klein groepie ’n gemeente geword wat hulle vergaderinge in ’n skoolsaal gehou het. Die broers en susters was baie bly toe hulle in Oktober 2022 na hulle nuwe Koninkryksaal getrek het.

Buiten Iqaluit, het spesiale pioniers saam met ander broers en susters in verskillende afgesonderde gebiede regdeur Nunavut gepreek. Broer Joel Therrien en sy vrou, Cheryl, was deel van die groep wat gegaan het. Hulle het na Baker Lake getrek, wat 1 329 kilometer wes van Iqaluit is. Broer Therrien sê: “Ten spyte van die koue weer, die afsondering en die uitgawes was elke opoffering die moeite werd. Jehovah se seën kon duidelik gesien word in die hartverblydende reaksie van die mense wat in Baker Lake bly. Ons het die geleentheid waardeer om die Bybel se boodskap te deel met die mense wat daar bly.”

Joseph Utatnaq wat in Baker Lake woon, was bly om oor die goeie nuus van die Koninkryk te hoor. Hy het die Bybel saam met broer Therrien gestudeer en is in 2021 gedoop. Broer Utatnaq is op die oomblik die enigste verkondiger in Baker Lake. Toe hy hoor dat die toewydingsprogram van die Koninkryksaal in Mei 2023 in Iqaluit sou wees, het hy alles in sy vermoë gedoen om dit by te woon. Dit was die eerste keer vandat hy gedoop is dat hy sy broers en susters in persoon by ’n Koninkryksaal ontmoet het. Hy sê: “Ek was so beïndruk toe ek die voltooide Koninkryksaal sien. Baie van dié wat met die bou van die saal gehelp het, het van ander plekke gekom en was nie gewoond aan die klimaat en die toestande hier nie. Dit was duidelik dat dit hulle liefde vir Jehovah en hulle naaste was wat hulle gemotiveer het.”

Daar is op die oomblik altesaam 178 broers en susters wat in vier gemeentes in die noordelike gebiede dien. Dit sluit een gemeente in Nunavut, twee gemeentes in die Noordwestelike Gebiede en een gemeente in Yukon in. Hierdie gebiede dek amper 40 persent van Kanada se landoppervlak. Die uiterste koue en die rowwe omgewing in Kanada se verre noorde maak dit moeilik om mense te kontak wat in hierdie afgesonderde dele bly. Daarom bewonder ons die pogings van ons broers en susters wat hulleself beskikbaar stel om die goeie nuus in hierdie afgeleë gebiede te verkondig. – Handelinge 1:8.