Op 3 April 2021 is die Nuwe Wêreld-vertaling van die Christelike Griekse Geskrifte in Mambwe-Lungu in elektroniese formaat vrygestel. Broer Albert Musonda, ’n lid van die Takkomitee in Zambië, het dit gedurende ’n vooraf opgeneemde program vrygestel. Die program is na verkondigers in Zambië en Tanzanië gestroom. Mambwe-Lungu word deur 2 531 verkondigers in Zambië en 325 verkondigers in Tanzanië gepraat, waar die taal ook bekend staan as Fipa.

’n Span van drie vertalers het 21 maande lank aan die projek gewerk. Een vertaler het verduidelik dat party dit moeilik gevind het om die bestaande Bybelvertaling in Mambwe-Lungu te verstaan as gevolg van die verouderde taal wat gebruik is. ’n Ander vertaler sê oor die Nuwe Wêreld-vertaling wat so pas vrygestel is: “Hierdie Bybel gebruik taal wat mense elke dag praat.”

Ons weet beslis dat hierdie wonderlike geskenk van Jehovah baie mense wat Mambwe-Lungu lees, sal help om dit te geniet om God se geïnspireerde Woord te lees. – Psalm 1:2.